.png)
Gazeta Si – Një 64-vjeçar, Isuf Hasa, është autori i dyshuar i vrasjes së fqinjit të tij 81-vjeçar, Xhemal Meta në Zall-Bastar të Tiranës në 13 janar të këtij viti, i cili është arrestuar këtë të mërkurë.
Në një deklaratë për mediat, Policia e Tiranës bën të ditur se Hasa, fqinj me viktimën ka shkuar me 13 janar rreth orës 09:00 në banesën e të moshuarit dhe për motive të dobëta e ka goditur me çekiç pas koke.
Pasi ka kryer vrasjen, ai i ka marrë dhe shumën monetare që 81-vjeçari ka pasur në xhep dhe më pas është larguar. Nga kontrollet që policia ka ushtruar në banesën e autorit të vrasjes, janë gjetur 200 mijë lekë të reja.
Policia ka ushtruar kontrolle dhe në banesën e vajzës së Isuf Hasës, ku kanë gjetur çekiçin me të cilin autori ka kryer vrasjen e Xhemal Metës.
“Lindi dyshimi se është vrarë me sende të forta, vijoi puna për zbardhjen e rrethana për këtë ngjarje. Janë kryer një sërë veproimesh dhe falë punës hetimore brenda 48 orëve, është bërë e mundur kapja e autorit të dyshuar Në 13 janar, Isuf Hasa ka shkuar në banesën e tij dhe e ka qëlluar me çekiç, dyshohet se autori pasi e ka goditur i ka marrë edhe lekët që viktima ka pasur në xhep dhe është larguar, është sekuestruar një sasi lekësh prej 200 mijë lekë. Në banesën e vajzës së tij u gjet çekiçi që ai ka kryer vrasjen”, – tha Drejtori i Policiës së Tiranës, Elton Alushi.
Dy ditë më parë në Njësinë Administrative Zall-Bastar, fshati Shëngjin, i moshuari Xhemal Meta u gjet i pajetë në oborrin e shtëpisë.
Pas kryerjes së ekzaminimit mjeko-ligjor, ka rezultuar se 81-vjeçari kishte dëmtime në pjesën e pasme të kokës.
81-vjeçari jetonte i vetëm në fshat, ndërsa familjarët e tij jetojnë në kryeqytet. Këta të fundit kanë deklaruar se i moshuari nuk kishte konflikte me askënd.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
