Nga Gazeta 'SI' - Bujqësia ka qenë debati i radhës midis opozitës dhe mazhorancës në komisionin për Çështjet Ligjore.
Fillimisht, ministrja e Bujqësisë Anila Denaj, prezantoi në komision ligjin për Veterinarinë, me qëllim forcimin e monitorimit dhe inspektimeve në këtë sektor për të garantuar siguri ushqimore sipas standardeve të BE-së.
Sipas saj, ndryshimet përmbushin një rregullor të plotë sipas BE-së, për prodhimin, kontrollin dhe cilësinë e produkteve veterinare për të garatuar sigurinë ushqimore në vend. Denaj tha se, ligji i mundëson prodhuesve të rrisin prodhimin ndërsa do të lehtësohen dhe barrierat administrative për regjistrimin e barnave veterinare të importit.
Deputetët e opozitës ngritën shqetësimin për shfarosjen e blegtorisë në vend, mbështetur në shifrat zyrtare të numrit të krerëve, injektimin e hormoneve në produktet bujqësore dhe ngërçet në skemat e subvencionimin të fermerëve.
Deputeti Dashnor Sula u shpreh se ndihma që marrin fermerët shqiptarë për bagëtitë e tyre është shumë më e ulët se vendet e rajonit dhe Europës, duke kërkuar që të rishikohet skema e rimbursimit për krerët.
Nga ana tjetër, deputetja Dhurata Çupi ngriti shqetësimin për cilësinë e mishit që konsumohet në Shqipëri dhe që përdoret nëpër Fast-Food dhe restorante.
Deputeti demokrat Saimir Korreshi e prezantoi ministren e Bujqësisë me krizën e grurit.
Sipas tij, gruri nuk po mblidhet më dhe ka një rënie me 90% të fushave të mbjella. Një tjetër shqetësim sipas tij është edhe mungesa e kompensimeve për fermerët. Ai tha se u bë një fushatë që lekët e naftës do t’i kaloheshin në llogari, por ende nuk ka ndodhur.
“E dini që ka dy vite grurin nuk e mbledhin më, nuk e hanë as lopët. Ka një rënie me 90% të fushave të grurit. I morët numrin e llogarive, por nuk i kaluat naftën, kur do kalojë këto leket për të marrë naftën? Si ka mundësi që nuk po subvencionohet më gruri? Ishte politike e kësaj qeverie”, u shpreh Korreshi.
Në fjalën e saj për t’ju përgjigjur deputetëve, ministrja Denaj tha se skema e financimit të blegtorëve nuk do të ndryshojë pasi imponon bashkimin e operatorëve dhe rritjen e blegtorisë në vend.
“Janë 15 kompani shqiptare që tregtojnë mish importi nga subjekte të licencuara nga BE në Brazil. Kjo është garanci e produkteve cilësore. Ata kanë kërkuar uljen e taksës që të bëhen më konkurrente dhe ne po e diskutojmë. Ka kontrolle dhe certifikata sipas standardeve. Në pikat kufitare, kemi një projekt me Bankën Botërore ku do të hapen 7 pika laboratorike për të kontrolluar produktet e importit”, u shpreh ministrja Denaj, duke shtuar se disa pyetjeve do t’u përgjigjet me shkrim.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
