Zgjedhja e 8 anëtarëve të KED pasditen e sotme, ka sjellë inkurajimin e ambasadës Amerikane në Tiranë dhe të ambasadorit të BE-së.
Javën e ardhshme presim përzgjedhjen e anëtarëve për KLP e KLGJ, ishte reagimi i ambasadës amerikane. Ndërsa ambasadori i BE në Tiranë u shpreh: “Ne presim me padurim javën e ardhshme kur Asambleja e Përgjithshme e Gjyqtarëve dhe Prokurorëve do të takohet për të ngritur KLGJ-në dhe KLP-në”.
“Këtë vit, Ambasada e SHBA iu ka bërë thirrje gjyqtarëve dhe prokurorëve të ndershëm, patriotë dhe me integritet për t’i shërbyer vendit të tyre në Këshillin e Lartë Gjyqësor dhe Këshillin e Lartë të Prokurorisë. Me formimin e këtyre dy institucioneve të drejtësisë në horizont, Shqipëria është në prag të krijimit të një sistemi drejtësie që i shërben vërtet interesave të qytetarëve të saj. Javën e ardhshme presim me kënaqësi përzgjedhjen e anëtarëve, të gjithë të cilët kanë kaluar tashmë vetingun, duke shënuar kështu hapin tjetër madhor drejt drejtësisë së vërtetë”, – thuhet në reagimin e ambasadës.
Gjithashtu, edhe ambasadori i Bashkimit Evropian në Tiranë, Luigi Soreca ka reaguar. “Sot, Kuvendi ka zgjedhur anëtarët e KED. Ky është një hap i rëndësishëm për zbatimin e reformës në drejtësi. Ne presim me padurim javën e ardhshme kur Asambleja e Përgjithshme e Gjyqtarëve dhe Prokurorëve do të takohet për të ngritur KLGJ-në dhe KLP-në”.
Ditën e sotme, Kuvendi ka hedhur shortin për zgjedhjen e 9 anëtarëve në Këshillin e Emërimeve në Drejtësi. Shorti u hodh pas refuzimit të Presidentit Ilir Meta për të mos vijuar me procesin për shkak të vakumit ligjor. Shorti ka nxjerrë 8 fitues duke lënë një vend vakant nga Prokuroria e Apelit, pasi kishte kandidat vetëm për një vend.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
