.png)
Gazeta Si – Episodi më emblematik që mori vëmendjen e të gjithë tifozëve dhe mediave gjatë ndeshjes Itali-Shqipëri, ka të bëjë me një tifoz shqiptar, i cili hyri në fushën e lojës me një flamur kuqezi në duar, duke e ndalur për disa minuta.
Pamjet janë bllokuar ‘live’ nga regjia qendrore televizive e UEFA-s për të parandaluar që raste të tilla të shihen nga publiku.
Megjithatë, identiteti dhe emri i tifozit shqiptar është zbuluar. Sipas mediave, ai quhet Sami Rexhepi dhe është me origjinë nga Skënderaj i Kosovës.
Rexhepi jeton në Dyseldorf të Gjermanisë dhe për mediat në Kosovë ka treguar arsyen se pse e mori atë veprim.
”Kisha vënë bast me djalin tim. Kjo ka qenë arsyeja”, raportohet të ketë thënë Rexhepi. Pasi u fut në fushë, Rexhepi përshëndeti disa prej futbollistëve të kombëtares, mes tyre edhe Rei Manajn, duke kryqëzyar duart.
Ndërkohë menjëherë ndërhyri sigurimi i stadiumit. Vetëm pasi i “dribloi” disa prej tyre, shqiptari nga Kosova rrëshqiti dhe më pas u neutralizua.
Ai është shoqëruar jashtë stadiumit dhe policia nuk ka marrë asnjë masë apo procedim penal ndaj tij. Sipas Rexhepit, autoritetet e kanë penalizuar duke i ndaluar futjen në stadiumet gjermane në të ardhmen.
Edhe pse Shqipëria humbi minimalisht me kampionët në fuqi të Euripës, Rexhepi e fitoi “ndeshjen” e tij, duke takuar djemtë e kombëtares, si përfaqësues i atyre 50 mijë kuqeizinjve në stadiumin e Dortmundit.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
