.png)
Sytë, mendjet dhe zemrat e të gjithë shqiptarëve janë tashmë në Dortmund, aty ku prej orës 21:00 Shqipëria e Sylvinhos do të nisë rrugëtimin në Kampionatin Europian, kompeticioin më madhor futbollistik në kontinent, aty ku kuqezinjtë përfaqësohen për herë të dytë në histori.
Një rrugëtim që nuk kishte si të niste më bukur, përballë Italisë fqinje, që për më tepër shkon në Gjermani me kurorën e kampionit mbi kokë dhe me misionin për ta mbrojtur atë sërish, teksa pengesa e parë do të jetë pikërisht Shqipëria e Sylvinhos.
LEXO EDHE:
- Sylvinho: Kam 2-3 dilema për formacionin me Italinë. Kemi grup të fortë por mundemi të bëjmë mirë
- A është Italia favorite në Europian? Njeriu-simbol dhe formacioni tipik i Spaletit kundër Shqipërisë
- FSHF jep informacione për tifozët shqiptarë që do të ndjekin Itali-Shqipëri
- Formacioni i mundshëm, ja si pritet të rreshtohet Shqipëria kundër Italisë
- Gjimshiti: Jemi gati! Duam ta nisim mbarë rrugëtimin në Euro 2024
- Ndeshja me Italinë/ Reuters: Shqipëria gati t'u shkaktojë probleme kampionëve
- ‘Me Shqipërinë është më e rrezikshmja’, Donnarumma flet për kuqezinjtë: Janë të shpejtë, duhet të japësh 100% të energjisë
Festa kuqezi, e nisur që në muajin nëntor kur u sigurua kualifikimi, është zhvendosur tashmë në Gjermani, me rrugët e Dortmundit dhe jo vetëm, të mbushura me shqiptarë që kanë vërshuar nga të gjithë anët e globit, për të qenë aty, në mbështetje të kombëtares tonë.
Entuziazëm I dukshëm edhe te të besuarit e Sylvinhos, që prej më shumë se dy javësh vijojnë përgatitjet për të bërë një përfaqësim sa më dinjitoz dhe për të vijuar sa më gjatë aventurën në Gjermani 2024.
Për sfidën e mbrëmjes trajneri Brazilian ka ende dilema mbi skemën dhe formacionin që do të hedhë në fushë nga minuta e parë, diçka që e pranoi edhe vetë në konferencën për shtyp një ditë para ndeshjes.
Formacioni me të cilin me shumë mundësi do të prezantohet Shqipëria e trajnerit Sylvinho është: Berisha; Hysaj; Ismajli; Gjimshiti; Mitaj; Asllani; Ramadani; Bajrami; Asani; Broja; Seferi.
Ndërsa nga ana tjetër Italia e trajnerit Spalletti, me shumë mundësi do të zbresë në fushë me këtë formacion: Donnarumma; Di Lorenzo, Bastoni, Calafiori, Dimarco; Jorginho, Barella; Chiesa, Frattesi, Pellegrini; Scamacca.
Varianti 1:
Dilema e parë lidhet me rreshtimin, pasi krahas skemës 4-2-3-1 të zakonshme, trajneri brazilian joshet edhe nga ajo 4-3-3, që do të sillte aktivizimin e një mesfushori më shumë dhe uljen në stol të një sulmuesi, për më shumë ekuilibër.
Në portë ka gjithashtu dilema, teksa Berisha duket më i avantazhuar, por vetëm në fund do të mësohet se kush e ka fituar balotazhin. Është rritur ndjeshëm në hierarki edhe Arlind Ajeti, i cili po garon fort për një vend në formacion me Ardjan Ismajlin, teksa vetëm njëri prej tyre do të zbresë në fushë nga fillimi në krah të Gjimshitit.
Varianti 2:
Në krahët e mbrojtjes nuk ka dilema, me Hysajn e Mitajn të konfirmuar titullarë, ashtu si edhe Asllanin e Ramadanin në mesfushë dhe Bajramin, Asanin e Seferin që do të lëvizin pas shpinës së Brojës.
E nëse Sylvinho zgjidh të përdorë rreshtimin 4-3-3, atëherë do të jetë Seferi ai që do të akomodohet në pankinë, për t’i lënë vendin e titullarit Qazim Laçit, me këtë të fundit që do të bashkohet me Asllanin e Ramadanin për të formuar treshen e mesfushës. /Supersport
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
