Në Londër po zhvillohet samiti i Investimeve në Ballkanin Perëndimor 2024. Në këtë aktivitet të organizuar nga Banka Evropiane për Rindërtim e Zhvillim marrin pjesë krerët e qeverisë së 5 vendeve të rajonit, mes tyre edhe kryeministri i Kosovës Albin Kurti dhe ajo e Serbisë, Ana Bërnabiç. Ndërkohë, kryeministri Edi Rama nuk do të jetë i pranishëm fizikisht në Londër, por mund të ketë një video-mesazh online.
Qëllimi i Samitit është të nxjerrë në pah mundësitë për investime dhe biznes në rajonin e Ballkanit Perëndimor dhe të promovojë projekte rajonale dhe ndërkufitare.
Gjatë samitit do të mbahet një seancë interaktive me pjesëmarrjen e gjashtë kryeministrave të Ballkanit Perëndimor, duke përfshirë pyetje dhe përgjigje të zgjeruara me investitorët e huaj.
BERZH thotë se Ballkani Perëndimor është një rajon prioritar dhe se ai mbetet një nga investitorët më të mëdhenj institucionalë në vendet e rajonit, me më shumë se 18 miliardë euro të investuara deri më sot. Ky është samiti i gjashtë i BERZH-it i këtij lloji. Samiti përurues i Ballkanit Perëndimor u zhvillua 10 vjet më parë, në shkurt 2014 dhe, për herë të parë, mblodhi së bashku të gjithë kryeministrat e rajonit
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
