Gazeta Si – Të mërkurën në mëngjes, një sulm rus në shkallë të gjerë goditi disa qytete të Ukrainës, përfshirë kryeqytetin Kiev.
Komandanti i Përgjithshëm i Forcave të Armatosura të Ukrainës, Valery Zaluzhni tha se në sulm u lëshuan 20 dronë dhe 44 raketa dhe se anti-ajrorët ukrainas rrëzuan përkatësisht 15 dhe 29 prej tyre.
Sulmi preku rajone të ndryshme të Ukrainës, por dëmet më të mëdha u zbuluan në Kiev, ku u godit një ndërtesë banimi 18-katëshe në lagjen “Holosiivskyi”.
Sulmi shkaktoi 3 të vdekur dhe 16 të plagosur, ndërsa një tjetër person u vra në rajonin jugor të Mykolaiv.
Në gjithë Ukrainën u lëshuan sirena rreth orës 6 të mëngjesit, kur Forcat Ajrore të Ukrainës paralajmëruar në Telegram për mundësinë e sulmeve raketore ruse nëpër vend.
Shpërthimet e para u dëgjuan pak para orës 7 të mëngjesit në Kiev.
“U frikësova kur u lëshuan sirenat, dhe ne erdhëm këtu me vrap”, tha për Reuters Tetyana, një 49-vjeçare që po strehohej në qendër të Kievit.
“Shpresoj se ata do t’i rrëzojnë të gjitha [raketat]. Lutem për mbrojtjen tonë”, shtoi ajo, derisa i përqafonte mbesën e vet dyvjeçare dhe një qen të vogël.
Disa pjesë të kryeqytetit ukrainas kanë mbetur pa energji elektrike si pasojë e sulmeve, thanë zyrtarët.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
