Një kontrabandist shqiptar është burgosur sot (26 janar) pasi komplotoi për të dërguar 16 emigrantë shqiptarë në Britaninë e Madhe, duke i pajisur me pasaporta false nga vende të BE-së dhe duke bërë prenotime të rreme në linjat ajrore.
S. R. përdori një ID të rreme italiane dhe vodhi identitetin e një njeriu të pafajshëm për të hapur llogari bankare për të blerë bileta ajrore për në Mbretërinë e Bashkuar.
Emigrantët, të gjithë nga Shqipëria, paguanin një pasaportë false të BE-së dhe një biletë ajrore për në Britaninë e Madhe.
Për këtë lloj lehtësimi kriminelët mund të paguanin mbi 10,000 £ për person. Ruçi u dënua sot me tre vjet në Gjykatën e Kurorës në Isleëorth, për komplot për të ndihmuar imigracionin e paligjshëm.
Në shumë raste, dokumentet dhe rezervimet mashtruese janë identifikuar nga linjat ajrore ose autoritetet evropiane të aeroportit përpara nisjes.
16 individë udhëtuan për në Mbretërinë e Bashkuar, por dokumentet e tyre u zbuluan si false nga oficerët e Forcave Kufitare pas mbërritjes.
Me bashkëpunimin e aeroporteve dhe linjave ajrore, hetuesit e Home Office ishin në gjendje të lidhnin prenotimet së bashku dhe t’i gjurmonin tek i arrestuari.
Hetimet në celularin e tij zbuluan edhe më shumë dokumente false, gati për t’u përdorur për qëllime kriminale.
Chris Foster, Zëvendës Drejtor i Hetimeve Kriminale dhe Financiare në Home Office, tha se “Dënimi i sotëm është rezultat i një bashkëpunimi të fortë mes agjencive për të sjellë para drejtësisë këtë trafikant njerëzish. Sot kemi hequr një hallkë tjetër në zinxhirin e kriminelëve të organizuar që lehtësojnë hyrjen e paligjshme në MB. Unë jam mirënjohës për përpjekjet e palodhshme të oficerëve që identifikuan dhe hetuan këtë rast kompleks”.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
