Nga Gazeta ‘SI’ – Me nisjen e vitit të ri 2024, disa zona të qytetit të Vlorës dhe Shkodrës do të paguajnë më shumë para për taksën e ndikimit në infrastrukturë. Këshillat Bashkiake të dy qyteteve kanë miratuar ndryshimet e reja.
Vlora
Për ndërtimet e reja në Vlorë, kjo taksë do të jetë 4 deri në 8%. Sipas vendimit, ndërtimet e reja në bulevardin kryesor, zona Transballkanike dhe në njësinë Orikum, do të paguajnë 6% taksë ndikimi në ndërtim.
8% do të aplikohet në zonën e Skelës dhe Tunelit, pra zonat me më shumë aktivitet ekonomik.
Shkodra
Edhe Këshilli Bashkiak i Shkodrës ka miratuar të njëjtën normë taksimi për ndërtesat e reja, të ndara po sipas zonave. Në Theth, Velipojë, Shirokë dhe zonën historike të qytetit, taksa për ndikimin në infrastrukturë është vendosur 8%.
Në hapësirën brenda qytetit taksa është vendosur 6% dhe për të gjitha njësitë e tjera që Shkodra administron 4%.
Rritja e kësaj takse, si kosto e shtuar pritet të rrisë më tej çmimet e banesave në të dyja qytetet që prej kohësh janë bërë destinacione turistike me rëndësi dhe tërheqëse për investim në imobiliare. Një presion i shtuar pritet të jetë edhe rishikimi i çmimeve të referencës për zonat bregdetare, siç njoftoi ministri Mete, duke shtrenjtuar automatikisht pronat pranë detit.
Subjekt i taksës së ndikimit në infrastrukturë nga ndërtimet e reja janë të gjitha bizneset që kërkojnë të pajisen me leje zhvillimore dhe leje ndërtimi për objekte banimi, administrative, prodhimi, shërbimi e tjera.
Për Tiranën kjo taksë është në nivelin maksimal 8% dhe është kthyer në burimin kryesor të të ardhurave për Bashkinë Tiranë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
