Gazeta Si – Prokuroria e Tiranës ka mbyllur hetimet për vrasjen e Edmond Papës dhe ka dorëzuar në gjykatë dosjen ndaj dy autorëve të dyshuar, Andrea Bode dhe Albano Velo.
Ndaj tyre rëndon akuza e “vrasjes me paramendim”. Papa dyshohet se u vra në shenjë hakmarrjeje për vrasjen e Aleksandër Sadikajt i njohur ndryshe si “Sanço”, gjatë një atentati me minë të telekomanduar.
Prokuroria ka ndarë një procedim penal për të identifikuar personat e tjerë të përfshirë në vrasjen e Papës.
LEXO EDHE:
– Aleksandër Sadikaj përgjohej. Si i humbi arma në bujtinë dhe biseda me familjarët: Vriti të gjithë!
– Vrasja e Edmond Papës, autori e priste për ta ekzekutuar. Dinamika dhe pistat e hetimit
Edmond Papa u ekzekuta në Tiranë më 16 dhjetor 2022 dhe dyshohet se u eleminua si shenjë hakmarrje ndaj vrasjes së 27-vjeçarit Aleksandër Sadikajt tek rrethrrotullimi i TEG, më 11 qershor 2022.
Albano Velo, 30-vjeçari i arrestuar nga policia e Tiranës si autori i dyshuar i vrasjes së biznesmenit Edmond Papa, është kunati i Aleksandër Sadikajt. I riu është bashkëshorti i motrës së Aleksandër Sadikajt dhe djali i një efektivi policie.
Ndërkohë, Andrea (Edvin) Bode, i dyshuari si një nga autorët që morën pjesë në ekzekutimin e Edmond Papës është ende në kërkim.
Në dosjen e Prokurorisë thuhet se Bode është i dyshuari kryesor si ekzekutor i Papës, e provuar sipas saj nga pamjet filmike dhe qelizat telefonike që kanë konstatuar prezencën e tij pranë vendit të ngjarjes në kohën kur është kryer vrasja.
44-vjeçari rezulton me precedent penal për drogë, por i pa dënuar me vendim të formës së prerë. Hetuesit dyshojnë se ky i fundit ka gisht në ekzekutimin mafioz të disa muajve më parë.
Deri në këtë fazë të hetimit, hakmarrja, por edhe trafiku i lëndëve narkotike është pista kryesore që dyshohet se solli vrasjen e biznesmenit.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
