Gazeta Si – Gjykata e Posaçme e Apelit ka rrëzuar ankimin ndaj vendimit të GJKKO duke lënë në fuqi vendimin për “arrest në burg” për ish-nëndrejtorin e policisë së Tiranës, Erzen Breçani, shefin e krimeve të rënda në komisariatin nr. 6 Dedan Gjonin dhe dy personave të tjerë, Besmir Murati dhe Bujar Ajeti.
Nëntorin e kaluar, SPAK lëshoi 11 urdhër-arreste, mes të cilëve iDedan Gjoni, Erzen Breçani, Bujar Ajeti dhe Besmir Murati. Ata akuzohen për “pastrim parash”, “grup i strukturuar kriminal”, “trafik droge”, “sigurim kushtesh për të kryer vrasje”, “shpërdorim detyre” dhe “përkrahje të autorit të krimit”.
SPAK dyshon se Erzen Breçani, ish-zyrtari i lartë i Policisë, ka investuar paratë e paligjshme të të birit për ndërtimin e HEC-eve. Në dosjen e Prokurorisë së Posaçme thuhet se Breçani kishte dijeni të plotë mbi aktivitetin e paligjshëm të djalit të tij, Eralbi Breçani.
LEXO EDHE:
– Ish-shefi i krimeve, Dedan Gjoni dyshohet i përfshirë në një tentativë për vrasje me porosi nga Holanda
– Përgjimet e SKY/ Ana e errët e Erzen Breçanit
Në dosje përmendet aktiviteti tregtar i “HEC DRITA ENERGY”, që sipas SPAK-ut, ka si administrator Eralbi Breçanin, ende në kërkim. Investimet janë përftime të paligjshme, nën mbulimin që janë financime nga kredia.
Për SPAK-un, Breçani u ka dhënë informacione Bujar Ajetit dhe Nuredin Dumanin, që të shmangnin komunikimet dhe çdo lëvizje që mund të sillte arrestimin e tyre.
Për Jonida Babameton pranohet se ka shpërdoruar detyrën, pasi ka kryer me dashje shkeljen e detyrës si specialiste e ‘ZQK Interpol Tirana’, duke i vendosur në dispozicion informacionin e klasifikuar Dedan Gjonit, ish-shef i krimeve në Kombinat.
Ai këtë informacion ua ka përcjellë personave të ndryshëm në konflikt me ligjin, sipas SPAK-ut. Dedan Gjoni dyshohet se ishte në dijeni të plotë të qëllimeve të shtetasit Ismail Zeneli dhe ka komunikuar intensivisht për të saktësuar vendndodhjen e vëllezërve Nela.
Në një bisedë të 24 shkurtit 2021 thuhet: ‘Besoj se kësaj radhe jemi në shenjë, me qetësi do e marrim tani, jemi në kohë’.
Ata që po kërkoheshin dhe që po gjurmoheshin ishin Edmond Nela, Albert Nela dhe Silvi Nela dhe qëllimi ishte për t’i vrarë. Personi që kryente orientimet ishte Bujar Ajeti, – dyshon SPAK, që ilustron nga bisedat e përftuara dhe përpjekjet e të tjerëve për të trafikuar kokainë nga vendet e origjinës drejt Europës.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
