.png)
Nga Gazeta Si – Gjatë seancës dëgjimore publike me grupet e interesit për projektligjin “Për buxhetin e vitit 2024″ në Komisionin e Shëndetësisë, organizata të ndryshme kanë folur për kërkesat e tyre dhe ankesat që kanë në lidhje me mungesën e vëmendjes për problematika të ndryshme.
Përfaqësues të “Down Syndrome Albania” propozuan që kujdestaria të buxhetohet për fëmijët mbi 13 vjeç me sindromën down.
“Të paktën prindërit që kanë fëmijë mbi 13 vjeç që janë të diagnostikuar me sindromën down të paguhen si kujdestarë”, tha përfaqësuesja e DSA, Rezarta Çaushaj.
Ajo gjithashtu tha në komision se ka mangësi në mbështetje të fëmijëve me aftësi të kufizuara në arsim.
“Mungojnë mësuesit mbështetës. Në vend janë rreth 5 mijë nxënës me aftësi ndryshe që kanë nevojë për mësues mbështetës ndërkohë që një mësues mbështetës ka 4-5 nxënës. Kërkojmë që të trajnohen më shumë mësues mbështetës. Gjithashtu vlen të themi se ka mungesë të kurrikulave të përshtatura për fëmijët me aftësi ndryshe. Duhet të punohet edhe në këtë fushë”, tha Çaushaj e cila shpreh edhe një problematikë tjetër, atë të shërbimeve.
Çaushaj tha se duhet që shërbimet bazë që merren në privat për fëmijët me aftësi ndryshe të rimbursohen nga shteti me 50%.
Ndërkohë, Donika Godaj nga Organizata YWCA kërkoi në Komision që të ketë një paketë për kancerin e gjirit.
“Duam të sigurohen paruke dhe proteza gjiri për t’u ardhur në ndihmë të gjitha grave që vuajnë nga kanceri i gjirit. Duhet të jenë në çdo spital, si në Tiranë ashtu edhe në spitalet rajonale. Kjo do i lehtësonte shumë psikologjikisht gratë që vuajnë nga kanceri i gjirit”, tha Godaj.
Redina Çanaku, përfaqësuese e Organizatës “Together For Life” tha në Komisionin e Shëndetësisë se fertilizimi in vitro vijon të lihet në hije, duke u hequr mundësinë të gjithë çifteve që duan të bëhen prindër.
“Duam më shumë informacione për paketën e fertilizimit in vitro. Janë shumë çifte që e duan paketën por nuk e marrin dot sepse prej vitesh nuk marrin një përgjigje pse nuk munden”, thotë Çanaku, duke shtuar se politikat shëndetësore nuk janë prioritet për qeverinë.
Ndërsa Ajsela Kushova, përfaqësuese e prindërve që kanë fëmijë që vuajnë nga fibroza cistike tha se mungon një protokoll për fibrozën cistike dhe mungesa e vëmendjes së Ministrisë së Shëndetësisë për këtë çrregullim, ka bërë që prindërit të kenë vështirësi në gjetjen e medikamenteve.
“Nuk gjejmë dot medikamente për fëmijët. Një tjetër problem është se prindërit shpesh herë janë të detyruar të lënë punën për t’u kujdesur për fëmijët dhe kjo krijon probleme në punën e tyre. Duam që të paktën të ketë një pagesë për njërin prind që kujdeset për fëmijët”, tha Kushova, duke shtuar se prej kohësh kanë kërkuar që të fillojnë të përfitojnë kujdestarinë me pagesë, që të jenë më të sigurt në ekonominë e familjes ndërkohë që kujdesen për fëmijët që vuajnë nga fibroza cistike.
Disa prej këtyre problematikave u dha përgjigje Mira Rakacolli, zv.ministrja e shëndetësisë e cila tha e për momentin janë në shqyrtim të paketës së kancerit të gjirit dhe do të realizohet, pra grave të prekura nga kanceri i gjirit do u mundësohen paruket dhe protezat e kancerit të gjirit.
Ndërkohë Rakacolli foli edhe për fertilizimin in vitro ku tha se është i parashikuar në buxhetin e vitit 2023 dhe deri më tani ka përfunduar infrastruktura dhe janë mundësuar medikamentet.
“Tani po hartohen kriteret se si mund të jetë një çift përfitues dhe e gjithë rruga që do të ndiqet. Është parashikuar që Brenda këtij viti të fillojnë 100 çiftet e para që e përfitojnë këtë shërbim”, tha Rakacolli.
Ndërsa prindërit që kanë fëmijë me fibrozë cistike do të kenë një takim me Ministrinë e Shëndetësisë për të biseduar për problematikat që hasin.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
