.png)
Gazeta Si – Me një ceremoni të zhvilluar sot në ambientet e kryeminsitrisë, kreu i qeverisë Edi Rama ka nderuar sportistin Alvin Karaqi, fitues i medaljes së artë në karate për Shqipërinë në Lojërat Europiane të zhvilluara në Poloni.
‘Ylli i Mirënjohjes Publike’ është titulli që i është akorduar karateistit nga Kosova, që përfaqëson Shqipërinë. Ai arriti një sukses të madh në sportin e karatesë, duke fituar medaljen e artë në Lojërat Europiane Krakov 2023, në kategorinë deri në 84 kilogramë. Në finale mundi holandezin Brian Timermans.
Pas fjalës së rastit të kryeministrit Rama dhe presidentit të KOKSH-it, Fidel Ylli, sportisti u shfaq shumë i emocionuar në sallë, madje mes lotësh falënderoi të gjithë ata që e kanë mbështetur në arritjen e këtij suksesi.
“Këtë medalje e kam fituar unë, por prapa saj është një ekip i madh që punon dhe dua t’i falënderoj të gjithë, sepse pa mbështetjen e tyre nuk mund ta bëja”, - theksoi Karaqi.
Kohët e fundit kryeministri Rama e ka bërë traditë që të nderojë me çmime të ndryshme në ceremoni speciale sportistët elitarë që sjellin medalje për Shqipërinë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
