.png)
Gazeta Si - GjKKO ka dënuar me 10 vite burg ish-ministrin e Mjedisit Lefter Koka lidhur me aferën e inceneratorit të Fierit, por për shkak të gjykimit të shkurtuar dënimi i ulet në 6.8 vite burg.
I njëjti dënim i kërkuar ndaj tij edhe në procesin për inceneratorin e Elbasanit. Gjithashtu gjykata vendosi dënim plotësues që për 5 vitet e ardhshme të mos ushtrojë asnjë funksion publik. U vendos që ish-ministrit t’i bllokohet një pasuri dhe t’i lirohen të tjerat.
Sa i takon Alqi Bllakos, për të cilin prokuroria kishte kërkuar dënimin e tij me 7 vite burg u bë një rikualifikim i veprës penale dhe Alqi Bllako u akuzua vetëm për shpërdorim detyre dhe përfundimisht e dënoi me 4 vite. Për shkak të gjykimit të shkurtuar konvertohet në 2 vite e 8 muaj.
Ndërsa për Klodian Zoton, aksioner kryesor i koncesionarit të Fierit ende në kërkim u kërkua dënimi 12 vite burg. Për shkak të pranimit të gjykimit të shkurtuar, përfundimisht prokuroria kërkon që ai të dënohet me 6 vite e 8 muaj burg.
Gjykata shpalli fajtor edhe Pëllumb Abeshin për të cilin vendosi dënimin me 3 vite e 6 muaj burg, që për shkak të gjykimit të shkurtuar iu ul në 2 vite e 4 muaj heqje lirie.
Gjithashtu gjykata vendosi pezullimin e vendimit për dënimin me burg dhe dënimin e tij me 4 vite shërbim prove duke urdhëruar lirimin e tij nga qelia.
Florian Muça dhe Azem Shatëri u dënuan me 3 vite burg, që për shkak të gjykimit të shkurtuar kthehet në 2 vite. Ata janë liruar për shkak se koha për të cilën kanë qëndruar në paraburgim është më e lartë se marzhi i dënimit.
Erjon Murataj u dënua me 3 vite burg që për shkak të gjykimit të shkurtuar konvertohet në 2 vite heqje lirie.
Sabina Canameri, Regan Merdani dhe Gentin Ziflan po ashtu u dënuan me 3 vite burgim, por gjykata vendosi që ta konvertojë në shërbim prove për 4 vite.
Loran Dusha dhe Arbër Denizi janë dënuar me 7 vite burg, por për shkak të gjykimit të shkurtuar u konvertohet në 4 vite e 8 muaj.
Sa i takon vendimit tjetër, bëhet fjalë për Arben Dervishajn, në cilësinë e kolaudatorit të punimeve, gjykata e ka gjetur të pafajshëm, duke urdhëruar lirimin e tij.
Arjola Kodra, administratorja e kompanisë “Integrated Energy” që fitoi koncensionin për ndërtimin e inceneratorit mori pafajësi gjithashtu.
Edhe Juri Imeri, që ka qenë administrator i një prej kompanive që dyshohej për krim të skemave mashtruese, u shpall i pafajshëm.
Hetimet për inceneratorin e Fierit u mbyllën dhjetor 2022. Sipas akuzave të SPAK, për inceneratorin e Fierit u paguan 4 milionë euro për punë që nuk u kryen asnjëherë, ndërsa 60 milionë lekë është dëmi i shkaktuar në buxhetin e shtetit në skemën e mashtrimit.
Në seancën e kaluar, (6 shtator) ish-ministri i Mjedisit Lefter Koka shfajësoi veten përballë akuzave lidhur me inceneratorin e Fierit.
Por sipas SPAK< ish-ministri përfitoi në mënyrë të parregullt shuma të ndryshme monetare, në mënyrë të tërthortë, nëpërmjet krijimit të një skeme fiktive për kryerjen e punimeve në shoqërinë koncesionare.
VENDIMI I GJKKO-së
Lefter Koka: 10 vite burg, për shkak të gjykimit të shkurtuar dënohet me 6 vite e 8 muaj
Alqi Bllako: 4 vite burg, për shkak të gjykimit të shkurtuar dënohet me 2 vite e 8 muaj
Klodian Zoto: 12 vite burg, për shkak të gjykimit të shkurtuar dënohet me 8 vite
Arben Dervishaj shpallet i pafajshëm
Arjola Kodra shpallet e pafajshme
Pëllumb Abeshi: 3 vite e 6 muaj burg, për shkak të gjykimit të shkurtuar dënohet me 2 vite e 4 muaj
Florian Muçaj: 3 vite burg, për shkak të gjykimit të shkurtuar dënohet me 2 vite
Azem Shatëri: 3 vite burg, për shkak të gjykimit të shkurtuar dënohet me 2 vite
Erjon Murataj: 3 vite burg, për shkak të gjykimit të shkurtuar dënohet me 2 vite
Sabina Cenameri: 3 vite burg (pezullim dënimi, për shkak se ka një fëmijë të mitur)
Loran Dusha: 7 vite burg, për shkak të gjykimit të shkurtuar dënohet me 4 vite e 8 muaj
Arbër Denizi: 7 vite burg, për shkak të gjykimit të shkurtuar dënohet me 4 vite e 8 muaj
Juri Imeraj shpallet i pafajshëm
Regan Merdani: 3 vite burg (pezullim dënimi)
Gentian Zifla: 3 vite burg (pezullim dënimi)
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
