.png)
Nga Gazeta ‘SI’ – Takimi i paralajmëruar i Guvernatorit të Bankës së Shqipërisë Gent Sejko me bankat tregtare në vend u zhvillua sot, me fokus zhvlerësimin e euros.
Sejko u kërkoi bankave tregtare të zhvillojnë kontratat forward (përdorimi i një kursi të fiksuar të këmbimit për kontratat e së ardhmes) sidomos për bizneset eksportuese.
Për të njëjtat biznese, që janë prekur më shumë nga zhvlerësimi i euros kundrejt lekut, Sejko i kërkoi që bankat të lehtësojnë procesin e kreditimit.
Guvernatori foli dhe për shëndetin financiar dhe ekonomik të Shqipërisë, duke parashikuar një mbarëvajtje të kreditimit të ekonomisë.
“Shëndeti financiar i ekonomisë shqiptare është i konsiderueshëm, falë përmirësimeve të vazhdueshme në sektorin e jashtëm, vënies nën kontroll të borxhit publik dhe fleksibilitetit operacional e bilanceve të shëndosha të biznesit shqiptar. Po ashtu, sektori bankar paraqitet me bilance të shëndetshme dhe një shkallë të lartë rezistence ndaj goditjeve të mundshme. Kjo rezistencë pasqyron modelin e tij të qëndrueshëm të biznesit, shkallën e lartë të likuiditetit dhe nivelin e kënaqshëm të kapitalizimit. Ky sektor, në tërësi, shfaq një maturi të shtuar e përqasje pro-aktive ndaj kreditimit të ekonomisë. Banka e Shqipërisë mbetet e bindur se sektori bankar do të vazhdojë të mbështesë me fonde e kredi ekonominë shqiptare, gjatë vitit 2023 e në vazhdim.”
Të dyja palët shprehën angazhimin e plotë për vijimin e bashkëpunimit të ndërsjellët institucional, si dhe, me autoritetet qendrore dhe vendore, në funksion të një sektori bankar sa më të shëndetshëm dhe mbështetës të zhvillimit ekonomik të vendit.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
