.png)
Pas mbledhjes mbi 10 orë të kryesisë së PD-së, 7 anëtarë të kryesisë njëherazi edhe deputet përfshi Sekretarin e Përgjithshëm Gazment Bardhi braktisën mbledhjen duke mos marrë pjesë në votimin e kryesisë.
Por dalja e tyre nuk ka qenë aq e qetë ashtu si edhe vetë mbledhja.
Pas largimit ata janë përplasur me një grup militantësh, ndër ta edhe u janë afruar deputetëve ndërsa dëgjoheshin nga larg thirrjet: “Po na torturoni, ju na keni torturuar në kurrizin tonë. Të bëni këto gjëra t’iu vijë turp. T’iu vijë turp”.
Siç raportohet edhe nga pjesëmarrës në takim por edhe seli, mbledhja ka qenë e shoqëruar me tensione, pasi një grup mbështetësish, të raportuar si njerëz të Lulzim Bashës, kanë qëndruar pas dyerve të kryesisë, ndërsa disa të tjerë disa metra larg selisë.
Për incidentin që nuk mund të kishte kaluar aq qetë nëse nuk do të kishte vetëpërmbajtje kryesisht nga deputetët e larguar ka reaguar Gazment Bardhi duke lëshuar një deklaratë në emër të grupit një ditë më pas.
Ajo që Bardhi vëren në emër të grupit është më shumë fakti që nuk ka pasur distancim nga PD-ja zyrtare rreth atij incidenti të cilën ai e cilëson si sjellje paramilitare.
“Dhuna verbale, presioni dhe shantazhi kundër deputetëve të PD që mendojnë ndryshe nuk janë mjete politike. Kjo sjellje prej grupimi paramilitar hedh në erë bashkëjetesën brenda kësaj force politike dhe dërrmon në mënyrë përfundimtare besimin e qytetarëve tek PD.
Duke dënuar me forcë aktet e dhunës kundër deputetëve të PD, anëtarëve të Kryesisë dhe gazetarëve, u kërkoj secilit kolegë të distancohen publikisht prej tyre. Përmes dhunës, presionit dhe shantazhit nuk ndërtohet asgjë afatgjatë, në interes të demokratëve dhe të Shqipërisë”, thuhet në deklaratën e grupit që drejtohet nga Gazment Bardhi
Deputetët që u larguan nga mbledhja dhe nuk morën pjesë në votim:
GAZMENT BARDHI
SAIMIR KORRESHI
HELIDON BUSHATI
DASHNOR SULA
LEFTER GESHTENJA
BLEDION NALLBATI
DHURATA ÇUPI
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
