NFL vjen me 5 ndeshje në Europë sezonin e ri, luhen në Londër dhe Frankfurt

10:49 - 11 Maj 2023

Gazeta Si – Fillon më 1 tetor në Angli dhe mbyllet më 5 dhe 12 nëntor në Gjermani, ku do të luajnë kampionët e Kansas Siti dhe legjendarët Patriots.

Pesë ndeshje në Europë, mes Londrës dhe Frankfurtit. NFL, apo futbolli amerikan, zbarkon në Europë sezonin e ardhshëm. Një spektakël për të mos u humbur, me ‘qershinë mbi tortë’ praninë në Gjermani të Kansas City Chiefs, kampionët në fuqi, kundër një skuadre ambicioze si Miami Dolphins.

Kalendari komplet do të bëhet publik këto ditë, por tashmë është mësuar se NFL do të luajë 5 ndeshje në Europë. Nuk ka Meksikë këtë herë, si në të kaluarën e afërt, ka një dyfishim të ndeshjeve gjermane, pas debutimit në 2022-shin.

Confirmed. #NFLUK
— NFL UK (@NFLUK) May 10, 2023

Ndeshjet europiane të futbollit amerikan nisin me Jacksonville Jaguars-Atlanta Falcons, e vlefshme për javën e 4-t të kampionatit. Kjo ndeshje luhet më 1 tetor në stadiumin ‘Wembley’, katedralen sportive britanike. Po në Londër, por në stadiumin e Totenhemit, javën pasardhëse, Jaguars luajnë ndaj Buffalo Bills, një nga kandidatet për Super Bowl 2024.

Ndeshja e tretë është Tennessee-Baltimore, më 15 tetor, gjithmonë në Angli. Të gjitha këto ndeshje luhen në orën 14:30 (ora lokale).

Më 5 nëntor, në Frankurt luhet superndeshja Kansas City-Miami. Chiefs të Patrick Mahomes, sfidojnë Dolphins. Bëhet fjalë për një takim të javës së 9-të të NFL-së, më pas, më 12 nëntor, po në ‘Frankfurt Stadium’, luhet New England-Indianapolis.

Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.