Gazeta Si – Reali mbetet Real. Karim Benzema, i cili nuk zhgënjen kurrë në ndeshjet e mëdha, ishte autor i një triplete ndaj katalanasve. Madrilenët kanë fituar 0-4 në ‘Camp Nou’ ndeshjen gjysmëfinale të kthimit në Kupën e Mbretit dhe kanë fituar të drejtën për të shkuar në finale.
Real Madrid kaloi në avantazh në fundin e pjesës së parë me një kundërsulm vrastar, ku protagonist ishte Vinicius. Topin e shtyu i fundit drejt rrjetës Benzema, por goli iu njoh brazilianit, që bëri goditjen.
Në pjesën e dytë skena ishte e gjitha për Karim Benzema, autor i një triplete. Francezi dyfishoi me një gjuajtje të saktë rrafsh me tokën, më pas ktheu në gol një penallti të fituar nga Vinicius. Benzema shpërdoi një rast tjetër për shënoi, ashtu si Rodrigo, por kapiteni gjithsesi do të vinte ‘vulën’ me golin e 4-t për madrilenët 9 minuta para fundit.
Kapitullim për katalanasit, që ndoshta pas fitores 0-1 në ndeshjen e parë e kishin marrë pak lehtë. Në finale të Kupës së Mbretit shkon Reali dhe trajneri Karlo Ançeloti ka mundësinë të shtojë një tjetër trofe në palmaresin e tij.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
