Gazeta Si – Në Francë jetojnë të paktën 6 milionë myslimanë, 1/10-a e popullisisë sipas studimit të fundit demografik të Institutit Kombëtar të Statistikave. Historia e viteve të fundit e kombëtares franceze është e mbushur me yje të besimit islam, nga Zidan te Benzema. Megjithatë, Federata Franceze e Futbollit nuk bën asnjë përjashtim.
Në Ligue 1 nuk do të ndodhë si në Premier Ligë, ku ndeshjet mund të ndërpriten për t’u dhënë mundësi lojtarëve myslimanë që agjërojnë të konsumojnë diçka në perëndimin e diellit.
Parisi ka ndjekur rrugën e kundërt, siç bëhet me dije në një komunikim të Komisionit federal të arbitrave. “Na është bërë me dije, – shkruhet në dokumentin që ka përfunduar edhe në rrjetet sociale, – se disa ndeshje janë ndërprerë për të lejuar lojtarët që agjërojnë gjatë Ramazanit të konsumojnë ushqim.
Këto ndërprerje nuk respektojnë statutet federale. Federata dhe organet e tjera të shërbimit publik duhet të mbrojnë vlerat themelore të Republikës së Francës. Ndalohen gjatë kompeticioneve sportive që lidhen me Federatën fjalimet politike, ideologjike, religjoze, sindikaliste”, – shkruhet në komunikatë.
Mosrespektimi i rregullores, shpjegon Komisioni, do të thotë procedura disiplinore dhe ndëshkim, sepse ‘stadiumi nuk është një vend i shprehjes politike dhe religjoze, por i neutralitetit, ku promovohen vlerat e sportit, barazisë, vëllazërisë dhe paanshmërisë’.
Rregullorja është në linjë legjislacionin francez, që nga 2004-a ka forcuar vazhdimisht masat për shfaqjen e shenjave religjoze në shkolla dhe së fundi edhe në institucionet publike. Është ndaluar edhe mbajtja e burkës në rrugë. Federata ka ndaluar mbajtjen e saj për futbollistet. Kjo është një temë që ka sjellë gjithmonë polemika dhe debate në Francë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
