Gazeta Si – ‘Pas një burri të madh qëndron gjithmonë një grua e madhe’ – ka thënë Virginia Woolf. Por ndonjëherë është një grua që mund të krijojë ndonjë problem, si në rastin e historisë së Julian Nagelsman dhe Bajernit. Një histori dashurie fillimisht, e mbyllur në mënyrë të befasishme.
Duke kërkuar shkakun e një largimi që nuk justifikohet nga rezultatet, me skuadrën në vend të dytë dhe mes 8 më të mirave të Championsit. Shkakun e kanë qjetur në fakt faqet e gossip-it, por edhe gazetat serioze. Një nga arsyet e divorcit të trajnerit të ri nga klubi më i fuqishëm në Gjermani ka një emër: Lena Wurzenberger, ish-gazetare e ‘Bild’.
Vajza, ose më mirë profesioni i saj, nuk pëlqehej aspak nga një pjesë e lojtarëve të Bajernit, të cilët nuk kishin besim tek ajo. Ka një rregull të shenjtë në botën e futbollit të meshkujve: fjalët e dhomës së zhveshjes nuk thuhen jashtë. Është hisoria e zakonshme e rrobave të pista, që duhen larë në shtëpi.
Dikush në skuadër druhej se Nagelsman i lante edhe në sallon apo në tavolinën e mëngjesit dhe që aty përfundonin në centrifugën e ‘Bild’. Lena nga ana e saj ishte ankuar shpesh në redaksi: kur lidhja e saj me trajnerin u bë publike, drejtuesit e gazetës e spostuan nga redaksia sportive te kronika e Mynihut, por edhe kjo nuk mjaftoi.
Zërat për trajnerin dhe gazetaren vazhdonin të qarkullonin dhe publikohehsin edhe në gazetë pa e lajmëruar. Këtë gjë Lena nuk e pranonte dhe në fund, para shkarkimit të Nagelsman, ajo u largua nga ‘Bild’. Nagelsman pret një tjetër impenjim me klubet, ndërsa ajo e ka gjetur në zyrën e komunikimit të ‘Bmw’.
Lena dhe Julian u njohën kur ajo ndiqte Bajernin. Për të Nagelsman la gruan Verena, me të cilën ka dy fëmijë. Gjëra që ndodhin, por nëse e dashura e re nuk do të ishte gazetare sportive, te Bajerni askush nuk do të merrej me ndryshimet në jetën private të trajnerit.
Fakt është që te Bajerni gjërat nuk po funksiononin si më parë. Nagelsman dhe Lena ishin me pushime, duke bërë ski gjatë ndërprerjes së kampionatit, kur erdhi telefonata surprizë e administratorit të deleguar të klubit, Oliver Kahn, i cili komunikonte vendimin se trajneri ishte zëvendësuar nga Tomas Tuhel.
Ish-lojtari i Gjermanisë, Markus Babel, tha: “Di që raporti i tij me Lenën ishte një argument i shumëdiskutuar në dhomat e zhveshjes së Bajernit”. Nëse Lena ka luajtur një rol negativ në shkarkimin e Nagelsman, nuk mund të thuhet me siguri. Janë zëra si ato të dhomës së zhveshjes…
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
