Gazeta Si – Kur kanë kaluar rreth dy vite e gjysmë nga shpërthimi me tritol në objektin në ndërtim të biznesmenit Liman Gjoka në zonën e Ranës së Hedhur në Shëngjin, policia e Lezhës ka arrestuar një person të dyshuar si porositës të ngjarjes.
Shtetasi Zef Kola, banues në Tiranë, është ndaluar me urdhër të prokurorit të çështjes Françesk Ganaj, i cili pas hetimeve me metoda speciale ka arritur të zbardhë plotësisht këtë ngjarje.
Si autor të vendosjes së lëndës plasëse më herët janë dënuar me burg nga Gjykata e Lezhës dhe 2 autorët Erald Pajtani me 4 vite burg dhe Angli Stafuka me 2 vite, që të dy banues në Fushë-Krujë.
Objekti në ndërtim i biznesmenit Liman Gjoka u sulmua dy herë me lëndë plasëse, në muajit nëntor dhe dhjetor të vitit 2020, ndërsa për shpërthimin e dytë ende nuk është arritur të zbardhet.
Shkak i këtyre ngjarjeve në atë kohë dyshohej të ishin bërë konfliktet e pronësisë në lidhje me truallin ku po ndërtohej objekti disa katesh.
Tashmë Zef Kola, akuzohet për veprat penale “Shkatërrimi i pronës me eksploziv”, “Kanosja”, “Prishja e qetësisë publike” dhe “Mbajtja pa leje e armëve, armëve shpërthyese e municionit luftarak”.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
