.png)
Gazeta Si - Gjykata e Tiranës ka shtyrë këtë të mërkurë seancën gjyqësore në ngarkim të Fatjon Muratit dhe Kristian Gjinit të akuzuar për armëmbajtje pa leje.
Murati, i cili dyshohet se është arratisur jashtë vendit, është pronari i lokalit në "Don Bosko", ku disa ditë më parë u vra një banakiere dhe u plagosën 5 të tjerë pas të shtënave me armë.
Shkak i shtyrjes së seancës ishte mungesa e avokates së Gjinit, ndërsa përfaqësuesi ligjor i Muratit ishte i pranishëm.
Sot priteshin konkluzionet e prokurorisë, ndërsa seanca e radhës do të mbahet më 29 mars.
Mësohet se disa javë më parë Fation Murati, i cili ndodhej në masën e sigurisë “arrest shtëpie”, kishte kërkuar leje një mujore që të dilte nga shtëpia nga ora 08:00 deri në orën 20:00, për arsye shëndetësore, por i është refuzuar.
Mbrëmjen e 12 marsit breshëri plumbash u derdhën në lokalin e Fation Muratit në zonën e “Don Boskos”, ku viktimë mbeti banakierja, Mimoza Paja.
Të shtënat kapen edhe xhaxhain e pronarit të lokalit Shehat Murati, i ulur në tavolinë me të vëllanë dhe të afërm të tjerë të Fatjon Muratit.
Nga ngjarja mbetën të plagosur 4 klientë, ndërsa disa të tjerë shpëtuan pasi ndodheshin në pjesën më pak të ekspozuar nga këndi ku u qëllua.
Shënjestër kryesore e atentatit dyshohet të ketë qenë Fation Murati, person me precedentë kriminalë, i cili pak kohë më parë është liruar nga burgu nga Gjykata e Apelit me një masë më të butë sigurie.
Murati ishte lënë në “arrest shtëpie”, por pas kontrolleve të ushtruara pas atentatit nuk u gjet në banesë. Dyshohet se 33-vjeçari është larguar nga Shqipëria në drejtim të Kosovës.
Hetuesit dyshojnë se pas këtij atentati fshihet përplasja mes dy grupeve kriminale.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
