Gazeta Si – Pas mbrëmjes spektakolare që dhuroi sfida Liverpul-Real, sot është radha e Interit, që pret në ‘San Siro’ Porton. Mançester Siti luan në transfertë me Lajpcigun.
Duhet përqendrim, zemër dhe shpejtësi. Sepse në Europë është një tjetër futboll dhe tek Interi e dinë mirë, Ritmi është shumë i lartë dhe kush ndalet, është i humbur. Zikaltrit duhet të përballojnë para më shumë se 70 mijë tifozëve Porton, me qëllimin për të bërë gjysmën e rrugës së kualifikimit.
Kundërshtari është i vështirë dhe drejtohet nga Serxhio Konseisao, një mik i vjetër i Inzagit, ish-shok skuadre te Lacio. Nuk do të ketë shumë kohë për përqafime dhe kujtime, vëmendja do jetë te ndeshja dhe kualifikimi.
Trajneri Inzagi e ka të qartë peshën specifike që ka ky tur i Championsit. Ai ka pasur disa dilema për formacionin, para së gjithash kush do të luajë në krah të Lautaro Martinez në sulm, Xheko apo Lukaku. Mund të besojë te belgu që po përmirësohet, por edhe te Brozoviç. Portugezët janë gjithmonë të rrezikshëm, vijnë në këtë ndeshje pas 10 fitoresh radhazi.
Në ndeshjen tjetër, skuadra e Guardiolës është favorite absolute ndaj gjermanëve të Lajpcigut.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
