Gazeta Si – ‘Klasikja’ e futbollit shqiptar shkon për Vllazninë, që zbukuron garën e titutllit, duke e ngushtuar në 3 pikë diferencën me Tiranën kryesuese. Tifozët shkodranë kishin mbushur stadiumin, ndërsa niveli i lojës në fushë nuk u ngjit aty ku pritej. Goli i vetëm erdhi nga një penallti e fituar nga Balaj dhe e kontestuar nga Tirana.
Pjesa e parë ishte e varfër me raste. Tirana pati më shumë iniciativë, por nuk mundi të krijonte mundësi shënimi të pastra në portën e Vllaznisë. Shkodranët iu afruan golit vetëm në një moment, kur topi u devijua nga Najdovski drejt portës së tij, por Bekaj shmangu autogolin.
Ndeshja u zhbllokua papritur në pjesën e dytë. Arbitri Enea Jorgji akordoi një penallti për Vllaznisë pas një kontakti mes Balajt dhe Behiraçes në zonë. Tirana e kontestoi fort vendimin e tij dhe në dukje faulli ishte i lehtë, megjithatë asgjë nuk ndryshoi. Herald Marku mposhti Bekajn nga pika e bardhë.
Trajneri Orges Shehi bëri menjëherë disa lëvizje nga stoli, duke kërkuar barazimin e rezultatit. Në fushë u futën të rinjtë Nikqi dhe Qefalija. Edhe Josa mori masat, duke aktivizuar Latifin e më pas Krujën, Kainën dhe Boshnjakun.
Shkodranët ia dolën ta ruanin avantazhin deri në fund dhe tashmë e shohin veten vetëm 3 pikë pas Tiranës (37 dhe 34 pikë).
Ndeshja tjetër e luajtur sot mes Erzenit dhe Teutës u mbyll në barazim, 1-1. Kallaku shënoi me penallti për Teutën në fillim, ndërsa për Erzenin barazoi Leao në minutat e fundit.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
