.png)
Nga Gazeta Si – Nëse ju kërkohet të hamendësoni se çfarë po dëgjojnë të rinjtë nën 25 vjeç, nuk ka gjasa që të mendoni se ata zgjedhin muzikën orkestrale. E megjithatë një sondazh i publikuar në dhjetor 2022 nga Orkestra Filarmonike Mbretërore (RPO) zbuloi se 74% e banorëve të Mbretërisë së Bashkuar të moshës nën 25 vjeç kishte të ngjarë të përshtateshin pikërisht me atë në kohën e Krishtlindjes, krahasuar me vetëm 46% të njerëzve të moshës 55 ose më shumë. Këto shifra pasqyrojnë jo vetëm gjetjen më të gjerë të RPO-së se moshat nën 35 vjeç kanë më shumë gjasa të dëgjojnë muzikë orkestrale sesa prindërit e tyre, por edhe rritjen e përhapur të popullaritetit të muzikës klasike në përgjithësi, veçanërisht midis brezave të rinj.
Ka shumë arsye për këtë, por më me rëndësi është vala globale e Gjeneratës Z dhe artistëve të rinj klasikë, të cilët po gjejnë mënyra të reja për t’u dëgjuar.
Po ashtu po gjejnë edhe mjete të reja për të modernizuar atë që prej kohësh është quajtur zhanri më elitar i muzikës.
Në TIkTok, si dhe në Instagram, artistët e rinj klasikë kanë përdorur potencialin demokratik të sferës digjitale për të hequr perdet e rënda e për të prezantuar muzikën klasike dhe historinë e saj të rrëfyer në mënyra që janë të arritshme.
Për violinisten franceze Esther Abrami, rrugëtimi drejt famës së mediave sociale buroi nga një dëshirë për të ndarë më gjerësisht pasionin e saj.
Ajo ka vënë re se një pjesë e vogël e muzikantëve klasikë kishin hyrë në Instagram për të zgjeruar shtrirjen e tyre dhe vendosi të bënte të njëjtën gjë.
“Fillova të postoja disa dhe u habita nga reagimi që mora. Papritmas ju keni njerëz nga e gjithë bota që ju dëgjojnë dhe ju thonë se u ndrit ditën kur të shikojnë duke luajtur violinë”, tregon ajo.
Kështu, për të u hap një derë për një botë krejtësisht të re.
Baritoni nigeriano-amerikan dhe fansi i përjetshëm i hip-hop-it, Babatunde Akinboboye, gëzoi një rritje të ngjashme të shpejtë dhe befasuese në mediat sociale kur postoi videot e tij.
“Isha në makinë dhe kuptova se të dy pjesët funksiononin së bashku muzikalisht, kështu që fillova të këndoja sipas ritmit”, tregon ai.
Ai e ka dokumentuar momentin në telefonin e tij dhe videon e ka postuar në llogarinë personale në Facebook, duke supozuar se miqtë e tij do ta shijojnë më shumë se bashkëmoshatarët e tij të operës.
“Unë shkova për të fjetur, u zgjova të nesërmen në mëngjes dhe ishte zgjeruar në rrjetin tim të operës dhe shumë më tej”.
Të dy Abrami dhe Akinboboye iu futën muzikës klasike në adoleshencë, vonë sipas standardeve konvencionale dhe kultivuan pasionin e tyre për zhanrin në mënyrë të pavarur. Ky mbetet një faktor shtytës në dëshirën e tyre për të arritur audiencë të re, të cilën ata e kanë arritur në një shkallë mbresëlënëse, kryesisht vetëm duke qenë vetvetja. “Përfundova duke u bërë një influencues i operës duke ndarë pjesët e mia”, thotë Akinboboye.
Pianistja britanike Harriet Stubbs është një tjetër përkrahëse e zjarrtë e muzikës klasike për audiencën moderne, e cila ka gjetur mënyrat e saj për të tërhequr dëgjues të rinj.
Gjatë izolimeve të COVID-it, muzikantja performoi koncerte të shumta 20-minutëshe nga banesa e saj përdhese në West Kensington, duke hapur dritaret dhe duke përdorur një përforcues për të arritur dëgjuesit jashtë.
“Kam dhënë 250 koncerte”, ka treguar Stubbs.
Ajo u nderua me një medalje nga Mbretëresha për këtë akt shërbimi që shton dozat e humorit në komunitet.
Shkrirja e muzikës klasike me zhanre të tjera është një aspekt kryesor i praktikës së saj dhe i shumë të tjerëve në mesin e brezit të ri të artistëve klasikë.
Ndërthurja e vazhdueshme dhe shpesh e fuqishme e muzikës klasike me kulturën pop po vihet në plan të parë si pjesë e interesit në rritje për këtë zhanër.
Anëtarët adoleshentë të Orkestrës Kombëtare të Rinisë së Mbretërisë së Bashkuar sapo kanë përfunduar një mini-turne që përfshinte një performancë të “Also Sprach Zarathustra” të Richard Strauss.
Tenori ashendent polak Jakub Józef Orliński, pajtohet se muzika klasike kohët e fundit ka arritur një status “pothuajse hipster”. “Është bukur të shkosh në opera, të dish diçka, dhe kjo sepse ka shumë artistë të rinj që japin muzikë në nivelin më të lartë, ndërkohë që e bëjnë atë shumë argëtuese”, thotë ai. Ka, vëren ai, një interes të ringjallur për personalitete të muzikës klasike si Maria Callas dhe Pavarotti. /BBC/
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
