.png)
Gazeta Si - Pas 6 vitesh nga reforma në drejtësi, Gjykata Kushtetuese në Shqipëri do të jetë e plotë me 9 anëtarë.
Emërimi më i fundit ishte i Holta Zaçes nga Gjykata e Lartë, e cila zëvendëson Vitore Tushen, e vetmja që nuk u shkarkua nga Vettingu në drejtësi, e që si zv.kryetare ushtronte dhe detyrën e kryetares së këtij institucioni.
Pas këtij plotësimi, Gjykata Kushtetuese njoftoi këtë të martë se ka nisur procedurën për zgjedhjen e kryetarit.
Sipas ligjit, Kryetari i Gjykatës Kushtetuese zgjidhet me votim të fshehtë, me shumicën e votave të të gjithë gjyqtarëve të Gjykatës Kushtuese, për një periudhë 3-vjeçare me të drejtë rizgjedhjeje vetëm një herë.
Seanca, sipas ligjit, për zgjedhjen e Kryetarit drejtohet nga gjyqtari më i vjetër në detyrë. E sipas përllogaritjes së moshave, ajo pritet të drejtohet nga Marjana Semini si më e vjetra në moshë.
Në rast se ka më shumë se një kandidat dhe gjatë votimit asnjëri prej tyre nuk merr shumicën e parashikuar të votave, bëhet një votim i ri dhe, pas këtij, vijohet me votimin mes kandidatëve që kanë marrë numrin më të madh të votave.
Në përfundim të këtij votimi shpallet i zgjedhur kandidati që ka marrë shumicën e votave.
Në rast se asnjë nga kandidatët nuk ka marrë shumicën e votave ose votat janë ndarë në mënyrë të barabartë, ligji parashikon që Kryetari të caktohet me short.
Gjykata Kushtetuese mund të cilësohet si maja e karrierës së një gjyqtari dhe zakonisht në të bëjnë pjesë anëtarë që kanë përvojë disa vjeçare, si dhe të vjetër në moshë.
Por në Shqipëri kjo gjë e tillë nuk është respektuar si normë. Pas largimit të Tushes, anëtarja më e vjetër është Marjana Semini, 57 vjeçe.
Ndërsa me e reja mund të jetë Holta Zaçe. Gjithashtu ndryshe nga herët e tjera nga 9 anëtarë në këtë gjykata 6 janë femra dhe tre burra.
Historikisht Gjykata Kushtetuese është drejtuar nga burrat, e mund të ndodhë që këtë radhë mund të zgjidhet një grua në krye të këtij institucioni.
9 anëtarët dhe mosha
Marjana Semini 57 vjeçe
Holta Zaçe 47 vjeçe
Marsida Xhaferllari 48 vjeçe
Fiona Papajorgji 47 vjeçe
Elsa Toska 47 vjeçe
Sonila Bejtja 49 vjeçe
Dr. Sandër Beci 48 vjeç
Ilir Toska 53 vjeç
Gent Ibrahimi 53 vjeç
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
