Gjiganti ganez Awuche, njeriu më i gjatë në botë

Një spital lokal në veri të Ganës i tha 29-vjeçarit Sulemana Abdul Samed gjatë një prej kontrolleve të tij të fundit se ai kishte arritur lartësinë 9 ft 6 in (2.89 m). Kjo do ta bënte atë njeriun më të gjatë në botë, por kishte një kleçkë, pasi klinika rurale nuk mund të ishte e sigurt për gjatësinë e tij, sepse nuk kishte mjetet e duhura matëse.

I diagnostikuar me gjigantizëm disa vite më parë, i riu po ndiqte një takim mujor për t’u marrë me komplikimet e të jetuarit si gjigant, kur iu kërkua të qëndronte drejt kundër një shufre matëse. I njohur për të gjithë me pseudonimin e tij Awuche, që do të thotë “Le të shkojmë” në Hausa, ai u befasua nga spektakli që po shkaktonte.

Kjo rritje në gjatësi filloi të vihej re kur ai ishte 22 vjeç dhe jetonte në kryeqytetin Akra. Awuche ishte zhvendosur atje për të provuar fatin e tij në qytet, ku jetonte një nga vëllezërit e tij, pasi mbaroi shkollën e mesme.

Ai punonte në një kasap, kursente para për të marrë mësime në një autoshkollë. Fillimisht ai vuri re se gjuha i ishte rritur aq shumë, sa s’mund të merrte dot as frymë. Ai vizitoi një farmaci lokale për të marrë disa ilaçe, por disa ditë më vonë ai kuptoi se çdo pjesë tjetër e trupit të tij kishte filluar të rritet në madhësi.

Kur familja dhe miqtë nga fshati i tij vizitonin qytetin, të gjithë do të vinin re për rritjen e tij dhe pikërisht në këtë pikë ai kuptoi se po kthehej gradualisht në një gjigant. Ai ka mbetur me një shpinë të lakuar anormalisht, një nga simptomat kryesore të gjendjes së tij, sindroma Marfan, një çrregullim gjenetik që prek indet lidhëse të trupit.

Komplikimet më serioze përfshijnë defekte në zemër. Mjekët thonë se ai ka nevojë për një procedurë kirurgjikale në trurin e tij për të ndaluar rritjen. Por sigurimi publik i kujdesit shëndetësor të Ganës nuk mund ta mbulojë këtë, duke siguruar vetëm trajtimin bazë. Për çdo vizitë në spital ai ende duhet të mbledhë rreth 50 dollarë (40 £).

Problemet e tij shëndetësore përfundimisht e detyruan atë të kthehej në fshatin e tij të lindjes gjashtë vjet më parë dhe të hiqte dorë nga ëndrrat e tij për t’u bërë shofer. Ai tani jeton me vëllain e tij – dhe ia del mbanë pasi krijoi një biznes të vogël që shet kredite për telefon celular. Lartësia e tij ka kufizuar edhe jetën e tij shoqërore.

Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.