.png)
Gazeta Si – Prej një viti e gjysmë janë shokë skuadre te PSG. Mesi është më i lidhur me Nejmarin, ndërsa me Mbape ka pasur edhe momente tensioni. Të dielën do të diskutojnë trofeun e madh dhe atë të shënuesit më të mirë. Të dy janë me nga 5 gola.
“Pothuajse miq", si titulli i filmit të njohur francez. Kilian Mbape dhe Lionel Mesi, kundërshtarë në finalen e së dielës në ‘Lusail Stadium’, janë shokë skuadre te PSG. Mes tyre tani nuk ka përplasje, por sezonin e shkuar dhe këtë aktual nuk kanë munguar fërkimet.
Faji është i rinovimit të kontratës nga francezi në momentin që ai ishte gati të ‘martohej’ me Real Madrid, por edhe lidhja që ‘pleshti’ ka me Nejmarin. Sepse braziliani dhe Mbape kanë pasur jo pak momente tensioni, i fundit më 13 gusht, për një penallti.
Të dy kanë pasur momente nervozizmi në fushë, edhe përpara telekamerave. Mbape kishte humbur një penallti dhe donte të gjuante edhe të dytën, por Nejmar nuk ia la. Në atë moment pati edhe ndonjë shtyrje dhe të gjithë u habitën nga gjesti.
Që atëherë ‘ujë poshtë urës’ ka kaluar shumë. Emiri Al Thani, nëpërmjet presidentit Al-Khelaïfi, u ka kërkuar tre yjeve të PSG-së që të mësonin të bashkëjetojnë. Në fushë dhe në dhomat e zhveshjes. Dhe në një intervistë të dhënë në tetor, numri 7 i Francës ka thënë: “Hierarkitë janë të qarta: pranoj të vrapoj kur Mesi ecën, nuk kam probleme. Po flasim për Mesin".
Kjo është njohja e një lidershipi që argjentinasi do ta ketë të paktën deri në fund të sezonit, kur skadon kontrata dhe ai duhet të vendosë se çfarë do të bëjë. Me zgjatjen e kontratës nga Mbape ishte parashikuar që francezi të kishte influencë në vendimet e rëndësishme.
Shumë mendojnë se trajneri Galtier është ‘bekuar’ nga Kilian, ashtu si dhe drejtori sportiv Luis Kampos, me të cilin ka punuar te Monako. Mesi ndërkohë është marrë nga Leonardo, i larguar për t’i bërë vend pikërisht Kamposit.
Nga shkurti e andej Mesi dhe Mbape, bashkë me Nejmarin, do të përpiqen të eliminojnë në 1/8-at e Championsit Bajernin. Nuk do jetë një shëtitje, sepse kampionët e Gjermanisë janë një pengesë e fortë për PSG-në.
Emiri kërkon trofeun e Championsit për të harruar zhgënjimet e mëdha. Dhe që të ndodhë kjo, ka nevojë që të tre yjet të shkëlqejnë bashkë, siç po ndodh në Botëror, ku Mbape dhe Mesi kanë shkuar në finale, kurse Nejmar u ndal në çerekfinale.
Mbape u shpall kampion në Rusi 4 vjet më parë, duke shënuar 4 gola. Pa mbushur 24 vjet, mund të fitojë Kupën e Dytë të Botës, një arritje e jashtëzakonshme. Jo rastësisht Pele në fazën finale të Botërorëve ka shënuar 8 gola. Edhe Mesi luan finalen e dytë të një Kupe Bote, por ndryshe nga francezi, ai e ka humbur të parën në Brazil 2014 ndaj Gjermanisë.
Ka qenë në prag të largimit nga Argjentina disa herë, por pastaj fitoi Libertadores dhe u karikua. Skuadra e tij humbi në debutim me Arabinë Saudite, ndërsa krahasimi me Maradonën nuk e terrorizon më. Është mësuar tashmë dhe nëse fiton të dielën, do të jetë çdo gjë ndryshe.
Me gjithë botën që do t’i shohë, në ‘Lusail Stadium’ dy fenomenet e gjeneratave të ndryshme do të diskutojnë Kupën e Botës, por edhe trofeun e shënuesit më të mirë, atë të lojtarit të turneut dhe me shumë mundësi edhe ‘Best Fifa’. Sepse ‘Topin e Artë’ e fitoi Benzema.
‘Best Fifa Football Wëards 2022’ jepet më 27 shkurt 2023 dhe votimi fillon më 12 janar. Botërori do të ketë një peshë të madhe. Mesi e ka fituar ‘Best Fifa’ në 2019-ën, Mbape asnjëherë. Ai i së dielës mund të jetë dueli i tyre i fundit në një skenë të madhe. Pastaj do luftojnë përkrah njëri-tjetrit për të pushtuar Europën me PSG-në. Si… thuajse miq.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
