Gazeta Si – Pesë personat e arrestuar dy ditë më parë për inceneratorin e Fierit janë lënë në burg këtë të premte nga Gjykata e Posaçme. Ata janë njohur me masën e sigurisë në prani të avokatëve të tyre në seancën që ka nisur prej orës 11:30 dhe përfundoi pas rreth dy orësh.
Të gjithë personat e ndaluar kanë mohuar të kenë kryer shkelje të ligjit të prokurimeve apo të mos kenë pasur konstatime dhe mungesa të informacioneve dhe korrespondencave mes autoritetit kontraktor dhe shoqërisë koncesionare e cila ka fituar dhe tenderin për ndërtimin e inceneratorit të Fierit.
Bëhet fjalë konkretisht për shtetasit Arben Dervishaj, Regan Merdani, Gentian Zifla, Robert Shabani dhe Enver Sheshi, ndërsa një i gjashtë është në masën “arrest shtëpiak”.
Ndërkohë vazhdojnë të jenë në kërkim edhe pesë persona të tjerë të dyshuar për çështjen e inceneratorit të Fierit, çështja e të cilit kulmoi në marsin e këtij viti, pas çështjes së regjistruar në vitin 2020.
Akuzat që rëndojnë mbi të arrestuarit e fundit janë: Korrupsioni pasiv, korrupsioni aktiv, shpërdorimi i detyrës, mashtrim me pasoja të rënda me skemat e TVSH-së.
Njëri prej tyre Arben Dervishaj, i cili ka pasur rolin e mbikëqyrësit sa i takon punimeve në inceneratorin e Fierit, dyshohet për korrupsion pasi ka firmosur situacione false sa i takon punimeve që në të vërtetë nuk ishin realizuar.
Ai gjithashtu dyshohet se është korruptuar nga shoqëria koncensionare në udhëtime me destinacion Italinë ku ka ndjekur ndeshje futbolli.
Edhe 4 të tjerët janë administratorë të tetë kompanive private që firmosën punimet dhe u bënë shkak që shoqëria koncensionare të kishte fitime.
Në marsin e këtij viti në lidhje me këtë çështje u vendosën arrest me burg ish-Ministri i Mjedisit Lefter Koka dhe ish sekretari i Përgjithshëm i kësaj ministrie Alqi Bllako.
Në këtë skemë numri i personave të dyshuar ka shkuar në 20, ndërsa SPAK vijon hetimet edhe për të tjerë.
Ata akuzohen nga SPAK si përgjegjës për një skemë mashtrimit me fatura fiktive në punimet e kryera në inceneratorin e Fierit, që i ka shkaktuar shtetit një dëm rreth 565 milionë lekësh.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
