.png)
Gazeta Si – Briken Sanaj, 39-vjeçari i cili u ekzekutua me armë zjarri mbrëmjen e së dielës në Tiranë, kishte qenë në një dasmë në Lezhë para se të vritej.
Kur ka mbaruar dasma e kushëririt të tij, ata kanë sjellë nusen në Tiranë tek pallati ku jetonte prej më shumë se një viti.
Dyshohet se autorët e kanë ndjekur viktimën gjatë gjithë ditës së diel deri në zonën e Kodrës së Diellit, aty ku zbrazën një breshëri kallashnikovi, duke i marrë jetën.
Një nga pistat që po heton policia, është një konflikt i vjetër i viktimës në Lezhë, ndonëse Briken Sanaj nuk kishte precedentë penalë.
Në vitin 2010 familja, Sanaj ka pasur një konflikt me familjen Kola për shkak të ngacmimit të një vajze.
Konflikti u ashpërsua dhe vëllai i vogël i Briken Sanajt plagosi një prej djemve të familjes Kola.
Mes familjeve nisi një hasmëri që pavarësisht përpjekjeve për pajtim nuk u realizua.
Dyshohet se në vrasje kanë marrë pjesë të paktën dy persona, ndërsa e gjithë ngjarja është regjistruar nga kamerat e sigurisë.
Megjithatë momentalisht si identiteti i autorëve ashtu sikurse edhe motivet mbeten mister.
Pas vrasjes, makina e autorëve u gjet e djegur në Qafë Kashar, ku brenda automjetit mësohet se është gjetur një armë kallashnikov. Ndërsa sa i përket targave ato rezultojnë të vjedhura në Tiranë pak ditë më parë.
39-vjeçari jetonte prej 1 viti te rezidenca e Kodrës së Diellit në Tiranë dhe njihej nga rojet e rezidencës me një identitet tjetër.
Ai sapo kishte parkuar makinën në garazh para se të ekzekutohej nga një distancë e afërt, me mjetin e autorëve që dyshohet se ka qenë në lëvizje.
Sanaj u dërgua në spital nga disa njerëz që ndodheshin në vendngjarje, por humbi jetën rrugës.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
