Gazeta Si – Shkoi keq fundjava në Holandë për Ferrarin, edhe pse Leklerk zurin vendin e tretë. Gafa me pit stop-in e Sainz, ku mungonte një gomë, ishte e pafalshme. Tashmë po shtohen ata që gjykojnë se te Ferrari duhet ndryshuar diçka.
Pikant është komenti i Niko Rosberg, ish-kampion bote. Ai e krahason strategjinë e Ferrarit me atë të një skuadre të Formula 2 apo Formula 3. Rosberg flet për paaftësi të kabinës aktuale të drejtimit te skuderia italiane. Ish-piloti e drejton gishtin te Matia Binoto.
“Nuk është e mundur të mos gjesh goma në bokse! Binoto mohon faktin që duhen ndryshime dhe thotë se çdo gjë po shkon mirë. Po kur vjen dita e garës? Nuk mund të vazhdohet kështu.
Disa skuadra të Formula 2 apo Formula 3 bëjnë një punë më të mirë se Ferrari sa u takon pit stop-eve dhe strategjisë. Si është e mundur, në kushte gare normale, të thërrasësh një makinë në bokse dhe të mos kesh gati të gjitha gomat? Herët a vonë duhet të vendosin të ndryshojnë.
Binoto thotë shpesh se është një teknik. Ndoshta është më mirë që në drejtim të jenë një teknik dhe një menaxher. E kemi parë në Spa dhe tani në Holandë. Ferrari po mbetet prapa me ritmin e garës. Duhet ta zhvillojë makinën në drejtimin e duhur”, – ka thënë Rosberg mes të tjerash.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
