Gazeta Si – Gjykata e Durrësit ka vendosur masën e sigurisë “arrest me burg” 18 ditë për Arben Ferizin, administratorin e kompanisë “Apetit Group” me seli në Prishtinë që kishte porositur ngarkesën me mish pule nga Brazili, ku u zbuluan 45.5 kg kokainë.
Po ashtu, gjykata caktoi 18 ditë burg për agjentin doganor Egert Vargu, deri në plotësimin e dokumentacioneve nga organi akuzës.
Gjatë seancës gjyqësore të kësaj të shtune, të dy kanë mohuar të jenë të përfshirë në ngjarje.
Përpara hetuesve vetë administratori i kompanisë ka treguar se porositë e kontejnerëve me mish i kryen online dhe se nuk ka dijeni për kokainën e zbuluar.
Arben Ferizi dhe Egert Vargu i kanë qëndruar deklaratave te tyre të mëhershme ku Ferizi është shprehur se nuk ka lidhje me drogën.
Sipas tyre kompania ka porositur mish pule dhe të gjithë veprimet i kryejnë online dhe në këtë mënyrë nuk kanë nga ta dinë se çfarë ka në kontenierë.
Ferizi ka deklaruar se kompania ka vite që merret me prodhimin e salçiçeve dhe është e suksesshme, prandaj nuk e ka nevojë të implikohet në trafikimin e drogës. Ai deklaroi se kompania nuk ka asnjë lidhje, nuk ka dijeni për praninë e lëndës narkotike në kontenier.
Kontejneri me mish pule ku u gjetën 40 pakot e kokainës kishte si destinacion final Maqedoninë e Veriut.
Dyshohet se rruga e kryer, ka qenë nga Brazili në Marok, më pas në Gjermani për të vijuar në portin e Pireut në Greqi dhe për të mbërritur më 20 maj në Portin e Durrësit.
Aty më pas ngarkesa ka qëndruar për ditë të tëra, derisa mesditën e 15 majit nga policia u zbuluan 45.5 kg kokainë, në pakot e së cilës kishte të stampuar foto të filmave të animuar.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
