Gazeta Si - Në Portin e Durrësit janë sekuestruar 45.5 kg lëndë narkotikë e dyshuar kokainë, mbrëmjen e 15 qershorit.
Mëngjesin e të enjtes, policia ka arrestuar Arben Ferizin, 30 vjeç banues në Prishtinë, me detyrë administrator në kompaninë që kishte porositur ngarkesën e mishit të pulës në Brazil.
Në pranga ra edhe shtetasi Egert Vargun, 39 vjeç banues në Tiranë, me detyrë agjent doganor i kontraktuar nga kjo kompani.
Sasia ishte ngarkuar në një kontejner me mish pule që vinte nga Brazili me destiancion final Maqedoninë e Veriut, e paketuar në 40 pako.
Pas kontrollit të ushtruar në kontenier, në brendësi të ngarkesës me mish pule u gjetën 40 pako me lëndë të dyshuar narkotike kokainë, me peshë 45 kg e 500 gramë. Pakot ishin të mbështejlla me personazhe të filmave vizatimore si ‘Goku’ dhe ‘Buda’.
Policia Kufitare e Portit të Durrësit dhe ajo Kriminale kanë pasur informacione paraprake për këtë ngarkesë që u sekuestrua gjatë operacionit "Tranziti".
Dy të ndaluarit, i kanë mohuar akuzat për përfshirje në trafikun e drogës gjatë marrjes në pyetje në polici.
Arben Ferizi, me detyrë administrator në kompaninë që kishte porositur ngarkesën e mishit të pulës në Brazil ka thënë.
“Kompania ime ka vite që merret me prodhimin e salçiçeve dhe është e suksesshme dhe nuk ka nevojë të implikohet në trafikimin e drogës. Ne si kompani nuk kemi asnjë lidhje dhe nuk kemi dijeni për praninë e lëndës narkotike në kontejner. Të gjitha veprimet kryhen online, porosia dhe blerja e mishit. Nuk është kompetencë e jona se çfarë gjendet në kontejner përtej asaj çka ne kemi porositur”.
Ndërsa Egert Vargu me detyrë agjent doganor i kontraktuar nga kjo kompani, ka thënë.
“Nuk kam dijeni, apo lidhje me drogën. Puna ime është të bëjë procedura zhdoganimi dhe nuk merrem me kontrollin e kontejnerëve. Nuk është në kompetencën time”.
Më datë 12 qershor, anija "Contship Eco" e nisur nga Brazili, ka hyrë në portin e Pireut, Greqi dhe më 13 qershor është nisur prej andej për në Shqipëri.
Kjo është sasi e dytë e kokainës së seluestruar në Durrës në harkun e një muaji. Më 17 maj, në një anije me qymur nga Kolumbia u sekuestruan 59 kg kokainë.
Pas kapjes së disa ngarkesave në kontejnerë me banane, dy rastet e fundit tregojnë se trafikantët ndërkombëtarë të drogës kanë ndryshuar strategjinë e futjes së kokainës nga Amerika Latine në Shqipëri.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.