.png)
Gazeta Si – Do të jetë një super sfidë ajo mes Rafael Nadalit dhe Novak Gjokoviçit. Dy emrat e mëdhenj të tenisit botëror do të ndeshen në çerekfinale të Roland Garros. Një përplasje gjigantësh.
Gjokoviç mundi në 1/8-at Diego Shvartzman 6-1, 6-3 dhe 6-3. Rafael Nadal kaloi pas 5 setesh Feliks Auger Aliasime. Tani këta emra të mëdhenj do të luajnë ndeshjen numër 59 të sfidës së tyre të pafundme.
Serbi nuk vuajti aspak, vetë rezultati tregon qartë dominimin e tij ndaj Shvartzman. Në formë shumë të mirë fizike, Gjokoviç i mbylli llogaritë me tri sete. Ndeshja zgjati 2 orë e një çerek.
Rafael Nadal bëri një ndeshje të madhe. Spanjolli ishte epik edhe në moshën 36-vjeçare. Atij iu deshën 4 orë e 21 minuta për të mposhtur Feliks Auger-Aliasime. Rafa ia doli të kualifikohej me rezultatin 3-6, 6-3, 6-2, 3-6 dhe 6-3.
Është hera e tretë që Nadal fiton një ndeshje në setin e 5-të në Paris. Tani vjen sfida me Gjokoviç, para së cilës spanjolli duhet të rikuperojë energjitë.
UN-REAL 👏 @RafaelNadal @rolandgarros | #RolandGarros pic.twitter.com/06S6Tpl2td
— ATP Tour (@atptour) May 29, 2022
Në çerekfinale ka kaluar edhe Aleksander Zverev, i cili mundi Berbabe Zapata Mirales 7-6, 7-5 dhe 6-3. Në çerekfinale gjermani do të ndeshet me Karlos Alkaraz. Ky i fundit nuk pati asnjë problem për të mposhtur 6-1, 6-4 dhe 6-4 rusin Karen Khaçanov.
Spanjolli 19-vjeçar është si një rul, që shtyp këdo që i del përpara. Ai e mbylli ndeshjen pas 2 orë e 14 minutash.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
