Gazeta Si – Këtë fundjavë debuton formati i ri: kualifikueset tradicionale do të bëhen ditën e premte, duke përcaktuar ‘pole position’ dhe rreshtimin para garës Sprint të së shtunës. Gara prej 100 kilometrash do t’i japë 8 pikë fituesit dhe sipas mbërritjes në finish do të skicohet edhe rreshtimi për nisjen e garës të së dielës.
Në Imola do zhvillohet për herë të parë F1 Sprint, minigara e së shtunës, i ideuar për ta barë fundjavën më emocionuese. ‘Sprint Qualifying Race’ e kemi parë vitin e kaluar në Silverston, Monca dhe San Paolo, kurse këtë vit ky format i riparë do të aplikohet në Imola, Zeltveg dhe po në San Paolo.
Si funksionon? Bëhet fjalë për një garë 100 km, pa detyrimin për pit stop. Në krahasim me formatin e 2021-shit, këtë vit do të jepen më shumë pikë, sepse nuk do të përfitojnë vetëm 3 të parët, por edhe 5 të tjerë, me 8 pikë për fituesin dhe pastaj në zbritje deri te vendi i 8-të, që fiton 1 pikë. Këto pikë do të shtohen edhe në klasifikimin e skuderive. Kjo garë përcakton gjithashtu edhe rreshtimin për nisjen e Çmimit të Madh të së dielës.
Po ‘pole position’? Vitin e kaluar i jepej fituesit të garës të së shtunës. Këtë vit ndryshon, kualifikueset tradicionale të formatit Q1-Q2-Q3 zhvillohen të premten, ku piloti më i shpjet fiton ‘pole position’, që vlen edhe për statistika. Ndryshimi është se rezultati i kualifikueseve shërben edhe për rreshtimin e nisjes të F1 Sprint të së shtunës.
Kjo e fundit pastaj përcakton rreshtimin për Çmimin e Madh të së dielës. Pra, mund të ndodhë që piloti fitues i ‘pole position’ të së premtes të mos niset i pari në garën e së dielës. I pari niset ai që fiton minigarën e së shtunës.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
