Gazeta Si – Testet para-sezonale të Formulës 1 që kanë nisur në Barcelonë kanë dhënë disa sinjale për Botërorin që pritet të nisë në mars. Më i shpejti në ditën e parë ishte Lando Norris i MekLaren, me kohën 1:19.568, me goma të buta. Pas tij dy makinat Ferrari të Leklerk dhe Saiz. Rasëll dhe Hemilton në vendet 4 dhe 5, ndërsa Vershtapen i 9-ti.
Në Montmelò skenën e morën dy Ferrarit, edhe pse dolën pas Lando Norrisit. Leklerk regjistroi kohën 1:20.165, kurse Sainz kohën 1:20.416. Francezi bëri 80 xhiro, kurse shoku i tij i skuadrës 73. Debutimi i modelit F1-75 sështë dukur pozitiv dhe skuderia nga Maranelo mund të ketë pritshmëri të larta në Botërorin 2022.
Xhorxh Rasëll dhe Ljuis Hemilton, të dy me goma C3, arritën respektivisht kohët 1:20.784 dhe 1:20.929. Modeli W13 i Mercedesit, duke parë këto teste, ndoshta ka ende punë për të bërë nga pikëpamja e bilancimit.
Kampioni i botës, Maks Vershtapen, e mbylli ditën në vend të 9-të, pas Fetelit (Aston Martin), Tsunodas (Alpha Tauri) dhe Alonsos (Alpine), me kohën 1:22.246, por përdori gjithë kohën goma të forta C2. Dhe u bënë plot 147 nga RB18, që i mahniti të gjithë për formën e saj. Valteri Botas (Alfa Romeo) kompletoi 10-shen më të mirë të ditës së parë të testeve.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
