Teknologjia e syrit bionik që synon të ndihmojë të verbrit të shohin

Njëherë e një kohë kishte disa dele të pazakonta australiane, me shikim jashtëzakonisht të mprehtë.

Një tufë e vogël kaloi tre muaj vitin e kaluar me sy artificialë bionikë, të vendosur me kirurgji pas retinës së syrit.

Këto delesh ishin pjesë e një sprove mjekësore që synon përfundimisht të ndihmojë njerëzit me disa lloje të verbërisë që të jenë në gjendje të shohin.

Qëllimi specifik i testit të deleve ishte të shihte nëse pajisja në fjalë, Phoenix 99, shkaktonte ndonjë reagim fizik të pafavorshëm dhe përfundimi ishte se nuk shkaktonte asnjë problem.

Si rezultat, tani është bërë një aplikim për të filluar testimin te pacientët njerëzorë.

Projekti po kryhet nga një ekip studiuesish nga Universiteti i Sidneit dhe Universiteti i Uellsit.

Phoenix 99 është i lidhur me valë me një kamerë të vogël të bashkangjitur në një palë syze, funksionon duke stimuluar retinën e përdoruesit. Retina është shtresa e qelizave të ndjeshme ndaj dritës në pjesën e pasme të syrit që konvertojnë dritën në mesazhe, dërgohen në tru përmes nervit optik dhe përpunohen në atë që shohim.

Pajisja Phoenix 99 është në gjendje të anashkalojë qelizat e dëmtuara të retinës dhe të ‘vërë në punë’ ato që janë ende në gjendje të punojnë.

“Nuk pati reagime të papritura nga indet rreth pajisjes dhe ne presim që ajo të mund të qëndrojë në vend për shumë vite”, thotë Samuel Eggenberger, një inxhinier biomjekësor në Shkollën e Inxhinierisë Biomjekësore të Universitetit të Sidneit.

Sipas Organizatës Botërore të Shëndetësisë, të paktën 2.2 miliardë njerëz në mbarë botën vuajnë nga një formë e dëmtuar e shikimit, duke filluar nga një nivel i butë deri në verbëri totale. OBSH thotë se ndikimi financiar i kësaj, për sa i përket humbjes së produktivitetit, është më shumë se 25 miliardë dollarë në vit për ekonominë globale.

Përdorimi i sistemeve të syve bionik për të ndihmuar në trajtimin e verbërisë është një industri ende në fillimet e saj, por me zhvillimet teknologjike që përparojnë me shpejtësi, një raport pret që sektori të ketë vlerë 426 milionë dollarë deri në vitin 2028.

“Përparimet në teknologji kanë ripërcaktuar oftalmologjinë”, thotë Diane Hilal-Campo, një okuliste në Nju Xhersi. “Inovacionet jo vetëm që e kanë bërë diagnozën më të lehtë dhe më të saktë, por kanë transformuar kujdesin ndaj pacientit për mirë”.

Si shembull, ajo tregon një sy bionik që tashmë i është vendosur më shumë se 350 njerëzve në mbarë botën, Argus II nga firma amerikane, Second Sight.

Kjo funksionon në të njëjtën mënyrë si Phoenix 99, dhe versioni fillestar iu përshtat për herë të parë një pacienti që në vitin 2011.

Second Sight po vazhdon tani punën për një produkt të ri të quajtur Orion. Ky është një implant truri, dhe kompania thotë se synon që Orion të jetë në gjendje të trajtojë pothuajse të gjitha format e verbërisë së thellë. Projekti është ende në fazat e hershme klinike.

Sisteme të tjera bionike të syve përfshijnë pajisjen Prima, e cila është zhvilluar nga firma franceze Pixium Vision dhe Bionic Eye System nga një ekip tjetër australian, Bionic Vision Technologies.

Hilal-Campo thotë se një problem aktual është kostoja e lartë e teknologjisë, e cila i bën ato “të arritshme për shumë pak njerëz”. Argus II, për shembull, kushton rreth 150,000 dollarë.

Ajo shton se meqenëse teknologjia është ende në fillimet e saj, rezultatet nuk janë ende pothuajse të përsosura. “Nuk kam asnjë dyshim se teknologjia ka transformuar jetën e pacientëve që kanë pasur fatin të marrin këto implante. Aktualisht, megjithatë, teknologjia është e kufizuar, duke lejuar vetëm perceptimin e dritës dhe hijeve dhe, në një farë mase, formave”, thotë Hilal-Campo.

Megjithatë, tregon Hilal-Campo, në vitet e ardhshme, firmat bioteknike do të vazhdojnë të gjejnë mënyra të reja për të ndihmuar personat që kanë humbur shikimin.

Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.