Edhe 42 ditë. Pak më shumë se një muaj dhe Real Madrid më në fund mund të njoftojë blerjen e Kilian Mbape. Sipas rregullores, mund ta bëjë më 1 janar, por do të ishte pak elegante, larg stilit madrilen. Mund të bëjë më pas, ndoshta edhe me kërkesën e vetë lojtarit, që dëshiron ta mbajë një marrëdhënie sa më qytetare me PSG-në deri më 30 qershor 2022.
Aktualisht, raporti mes klubi spanjoll dhe atij francez nuk është edhe aq i mirë. Leonardo nga një anë, Florentino Perez nga ana tjetër. “Kemi arritur në një moment, ku ofron 200 milionë për një lojtar dhe nuk ta shesin, – ka thënë të mërkurën presidenti i Real Madridit. – Kjo është çmenduria e klubeve që administrohen nga shtetet”.
Kilian Mbape do firmosë te Real Madrid një kontratë, nga e cila do të përfitojë 25 milionë euro neto në sezon, pak a shumë e njëjta shifër që i ka ofruar edhe PSG-ja për rinovimin.
Një peshë specifike ndryshe mund të ketë edhe ai që me shumë mundësi do të jetë sulmuesi i së ardhmes te Real Madrid, Erling Haaland. Shifra e 200 milionëve që Florentino Perez e kurseu në gusht, pas refuzimit të PSG-së për Mbape, mund të investohet verën e ardhshme për sulmuesin norvegjez të Borusia Dortmund.
Kjo shumë mjafton për të paguar 75 milionë eurot e klauzolës për prishjen e kontratës me klubin gjerman. Mund të bëhet 90 milionë kjo shifër, nëse shtohen bonuset që lidhen me paraqitjen e lojtarit. Rreth 30 milionë ndërkohë janë të destinuara për agjentin e sulmuesit, Mino Raiolën, si komision për transferimin.
Një investim prej më shumë se 100 milionësh, pa llogaritur pagën e Haland, me shumë mundësi rreth 15 milionë euro në sezon, dyfishi i asaj që merr në Dortmund. Me atë dhe Mbape, të paktën në sulm, Real Madrid mund të rrijë i qetë për një 10-vjeçar.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
