Pas disa ditësh të mbushura më zëra dhe zvarritje, tani merr formë zyrtare: Ksavi Hernandez është trajneri i ri i Barcelonës, pas shkarkimit të Ronald Koeman më 28 tetor. “Është momenti për t’u kthyer në shtëpi. Mirë se erdhe, Ksavi”, – shkruan në Tuiter klubi katalanas.
“Nuk ishte një lamtumirë, ishte një mirupafshim”, – shkruan më tej klubi spanjoll në një video që tregon homazhin e lojtarëve të Barcelonës për Ksavin, kur ai la ekipin në vitin 2015, pas 17 vitesh dhe 23 trofesh: 8 tituj në La Liga, 3 Champions, 6 Superkupa Spanje, 2 Kupa të Mbretit, 2 Superkupa të Europës dhe 2 Botërorë klubesh. Me Spanjën ka fituar 2 Europianë dhe 1 Botëror.
⚡ 𝑶𝑭𝑰𝑪𝑰𝑨𝑳 ⚡https://t.co/Y4H1t7RFHd
— FC Barcelona (@FCBarcelona_es) November 6, 2021
Kontrata e Ksavit me Barcelonën zgjat deri në vitin 2024. Ai lë kështu stolin e Al-Sad në Katar dhe të hënën do të prezantohet në “Camp Nou” nga drejtuesit e Barcelonës.
“Do të punojmë fort, jemi Barcelona. Jemi klubi më i mirë në botë dhe klubi më i mirë në botë duhet të fitojë, nuk mund të barazojë dhe humbë, – tha Ksavi në aeroportin e Dohas, para se të nisej për në Barcelonë, sipas ‘Mundo Deportivo’. – Do të përpiqemi t’i bëjmë lojtarët të kënaqur dhe të lumtur. Duhet punë e madhe me objektivin për të fituar. E di që duhet të punoj shumë për të bërë që gjërat të funksionojnë si duhet”.
Në profilin e tij në Instagram, trajneri i ri i katalanasve ka shkruar: “Camp Nou ka qenë gjithmonë shtëpia ime. Tifozët e Barcelonës janë njerëzit e mi, Barcelona është klubi që dua dhe tani jam kthyer në shtëpi”.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
