Është një histori e njohur tashmë në futbollin shqiptar bllokimi i merkatos për klube të ndryshme, për shkak të gjyqeve të humbura në FIFA, kryesisht për detyrime të pashlyera ndaj lojtarëve të huaj. Rasti më i fundit ka të bëjë me Tiranën, një klub që e ka hasur shpesh këtë problematikë.
Tirana e ka të bllokuar merkaton aktualisht, sepse nuk ka paguar një detyrim ndaj klubit afrikan Great Olimpics, nga ku ka marrë në 2020-ën dy futbollistët Ibrahim Sulej dhe Isak Giamfi. FIFA i ka dhënë të drejtë klubit afrikan, që pasi priti pagesën dhe ajo nuk u bë, e kaloi çështjen në gjyq. Dhe shuma për t’u paguar në këtë rast është qesharake, 20 mijë euro.
Në klubin kryeqytetas kanë bërë me dije se janë në dijeni të çështjes dhe se ajo do të zgjidhet shpejt, duke shmangur “alarmin” për merkaton e janarit.
Sipas klubit bardheblu, kjo pagesë nuk është bërë deri tani, sepse çështja ka kaluar dorë më dorë nga zyrtarët e mëparshëm të këtij klubi. Një justifikim i papranueshëm ky për një klub profesionist futbolli. Tani pritet që Tiranë të kryjë pagesat dhe të mos ketë probleme me merkaton.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
