Partizani nuk mundi të dilte nga kriza e rezultateve në derbin me Tiranën, ku u mund 1-0. Pas ndeshjes, nga drejtuesit e lartë të klubit të kuq ka pasur akuza të forta për gjykimin dhe konkretisht për kryesorin Eldorjan Hamiti.
Drejtori i përgjithshëm i Partizanit, Olsi Rama, e quajti Hamitin mbrojtësin e shtuar të Tiranës, ndërkohë që vuri në diskutim edhe vazhdimin e punës që bën në klubin e kuq: “Është një situatë që e përjetojmë edhe presionin. Po mendoj, nëse ia vlen të merresh me këtë punë apo jo. Tani ka edhe VAR dhe nuk është hera e parë me këtë Hamit lezhjanin. Ai është përsëritës, është ngelës. Fatkeqësisht, ka pak arbitra në Shqipëri, por mendoj që në situatën e VAR-it të ishim më të përgjegjshëm”, – theksoi Rama.
Të kuqtë kanë pretendime për një karton të kuq të munguar ndaj Najdovskit të Tiranës, kur ai goditi në lojën pa top mbrojtësin Saliu të Partizanit. Hamiti e pa këtë episod edhe në VAR, por gjykoi se gjithçka ishte nornale dhe nuk dha asnjë ndëshkim. Në atë moment rezultati ishte 0-0 dhe sipas drejtuesve të Partizanit, ndeshja mund të merrte rrjedhë tjetër.
Rezerva nga klubi i kuq ka pasur edhe për Tiranën. Trajneri Ilir Daja u shpreh pas ndeshjes e Tirana zhduku edhe topat rezervë në fundin e lojës, me qëllimin për ta vonuar sa më shumë atë. Partizani mbetet me 4 pikë pas 6 javësh dhe tashmë kanë nisur të qarkullojnë zërat për ndryshim në stol. Derbin e ndoqi nga tribuna edhe ish-trajneri i Tiranës, braziliani Ze Maria, që nuk e ka mohuar një bashkëpunim të mundshëm me Partizanin.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
