Kosova është mundur thellë në Suedi. Rezultati 3-0 flet qartë për ndeshjen e zhvilluar nga dardanët në “Friends Arena”. Duhet theksuar se rezultati u zhbllokua nga një episod shumë i diskutueshëm në pjesën e parë.
Arbitri italian, Di Belo, akordoi penallti për Suedinë, pasi qëndroi gati 6 minuta para monitorit të VAR-it, ku pa një prekje të topit me dorë të Rashanit. Emil Forsberg mposhti portierin Muriç nga pika e bardhë, duke i dhënë avantazhin skuadrës së tij.
Kosova ishte në lojë deri në minutën e 62-të, kur sulmuesi Isak realizoi një gol shumë të bukur nga jashtë zonës. Topi në trekëndësh dhe asnjë shans për portierin Muriç. Goli i tretë erdhi nga Kuaison, pak minuta pasi ishte futur në fushë. Lojtari suedez kaloi me lehtësi mbrojtësit e Kosovës dhe e dërgoi topin në rrjetë.
Ishte humbja e dytë për Kosovën ndaj Suedisë dhe me të njëjtin rezultat. Kujtojmë që edhe në Prishtinë suedëzët fituan 0-3. Kosova mban vendin e 4-t në Grupin B të eliminatoreve të Botërorit, me 4 pikë pas 6 ndeshjesh. Dardanët kanë mundur vetëm Gjeorgjinë dhe kanë barazuar me Greqinë në Prishtinë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
