Brazili duhet t’i bëjë llogaritë pa një prej lojtarëve të tij më të rëndësishëm, mesfushorit Kasemiro. Lojtari i Real Madrid nuk do të marrë pjesë në sfidat e Seleçaos ndaj Venezuelës, Kolumbisë dhe Uruguajit, të vlefshme për kualifikueset e Botërorit të Katarit. Arsyeja e mungesës është sa qesharake, aq edhe normale. Kasemiro ka probleme me dhëmballën e pjekurisë, që nuk e ka lënë të qetë ditët e fundit.
Në sitin e Federatës Braziliane të Futbollit është bërë i ditur edhe motivi që e bëri trajnerin Tite të linte jashtë Kasemiron dhe të thërriste në vend të tij Douglas Luizin.
“Kemi qenë në kontakte me Real Madridin dhe lojtarin. Kemi marrë nga klubi analizat dhe rekomandimin e mjekut, që tregojnë se Kasemiro ka një infeksion në dhëmballën e pjekurisë, çka e ka detyruar të bëjë pushim absolut, kështu që nuk mund të stërvitet gjatë 5 ditëve të ardhshme”, – ka sqaruar Rodrigo Lasmar, mjeku i kombëtares braziliane.
Në këto kushte, Kasemiro ka qëndruar në Spanjë dhe pas pushimit të rekomanduar nga mjeku do të rifillojë aktivitetin në fushë me Realin e Madridit.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
