“Një komando çeçenësh”, për të dëbuar nga vila ish-gruan e partnerit të xhudos së Putinit

Aforizmi i Anna Kareninas për familjet e palumtura, që janë të tilla “secila në mënyrën e vet”, është ndoshta më e cituara në ligjin (e dendur) të divorcit të oligarkëve rusë.

Një gjykatës në Londër, i cili ndau dy javë më parë me një marrëveshje 450 milionëshe çiftin miliarder Akhmedov, hapi seancën me frazën e Leon Tolstoit, duke e cilësuar divorcin si një gjë shumë të keqe. Por rekordi nuk zgjati shumë.

Sekuestrimi i vilës në Rivierën Franceze

Më 10 korrik, Natalia Sergeevna Rotenberg, ish-gruaja e njeriut më të pasur në Rusi dhe një mikeshë e ngushtë e presidentit Vladimir Putin (rrethanat janë të lidhura), nuk ishte në gjendje të kthehej në vilën e familjes në Cap Ferrat, në Rivierën Franceze.

Vila, shkroi ajo në Instagram, duke bashkëngjitur videot e kamerave të sigurisë, “ishte kapur nga një grup terroristësh çeçenë”.

Tridhjetë burrat e armatosur – rindërtimi i ngjarjes i konfirmuar më vonë nga TV francez, i cili transmetoi imazhe të sulmit – “nxorën rojet, pushtuan shtëpinë, hynë dhe zëvendësuan drynin”.

Porositësit e ndërhyrjes, ishin “oligarkë të nivelit të lartë që nuk e pëlqejnë stilin e jetës sime aktive. Unë e di kush jam”. Aludimi është për ish-burrin.

Njeriu më i pasur në Rusi

Ky është Arkady Romanovic Rotenberg: 69 vjeç, lindur në Shën Petersburg, patriark i familjes që sipas revistës “Forbes”, është sot më i pasuri në Rusi. Një pasuri prej 5.45 miliardë dollarësh u krijua gjatë viteve të koncesioneve të qeverisë, nga gazi te autostradat Mostotrest, nga lëvizja e tokës në botime, nga aeroportet te vodka.

Jo e parëndësishme, në këtë ngritje të tij, është miqësia me presidentin Putin, e fortë që nga viti 1963 kur, dymbëdhjetë vjeç, ata u stërvitën së bashku në një klub të famshëm “sambo”, arti marcial rus.

Tani, ata konkurrojnë në xhudo (Putini fiton) dhe Rotenberg nuk hezitoi, për shembull, ta deklarojë veten si “përfituesi i vërtetë” i super vilës së famshme në Detin e Zi, “të zbuluar” nga opozitari kritik i qeverisë, Aleksei Navalni, i cili ia atribuoi atë presidentit.

Për besnikërinë e tij ndaj mikut të Vladimir, ka edhe batuta: kur Biden e quajti atë “një vrasës”, qarkulloi një karikaturë e Rotenberg, që thoshte, “vrasësi jam unë!”.

Rotenbergët në fakt ishin ndër më të goditurit nga sanksionet e SHBA-ve dhe BE. Në vitin 2014, Italia kishte ngrirë llogaritë dhe hotelet e tyre në Romë.

Dy fëmijë, dhjetë vjet martesë

Arkady dhe Natalia Rotenberg u martuan në vitin 2005. Divorci u finalizua në vitin 2015 dhe në dekadën e tyre martesore, ka dy fëmijë, të moshës 9 dhe 11 vjeç, dhe asnjë fotografi të vetme së bashku.

Vajza zotëron 60% të vilës, nga e cila Natalia zotëron 40% të mbetur. Në divorc, ligji do t’i jepte gjysmën e pronës së përbashkët, por ajo do të ishte e kënaqur me “disa prona të paluajtshme”.

Në fund të fundit, ajo rindërtoi shpejt jetën e saj: tani ajo është gruaja e politikanit armen, Tigran Arzakantsyan. Ajo ka hapur dy kompani në Jerevan dhe është shumë aktive në fushatën e tij elektorale.

Me ish-burrin e saj, ajo gjithmonë ka thënë se mban “marrëdhënie të shkëlqyera. Unë nuk dua që ai të ketë ndonjë dëm dhe e mbaj gjithmonë në piedestal”, – tha ajo në një intervistë.

Kështjella, vepra arti dhe “Panama Papers”

Në realitet, ata kanë luftuar në gjykatë dhe jashtë, që nga viti 2013. Për vlerën prej 45 milionë eurosh në Surrey; për Magritte-n e tij, i cili përfundoi në skandalin “Panama Papers”, sepse ato ishin blerë nga firma fantazmë kineze që “pastronin” paratë, deri dhe te mbiemrin Rotenberg, të cilin ajo u përpoq ta depozitonte në vitin 2019, në mënyrë që të niste promovimin e linjës kozmetike dhe pijeve alkoolike ultra-luksoze.

Dhe tashmë, në vitin 2019, pas ndërhyrjes së armatosur, ajo kishte zbuluar ndryshimin e bravave të dyerve të vilës në Rivierën Franceze, por një urdhër nga gjykatësi, e kishte lejuar atë të kthehej.

Tani në “Forbes Rusi”, një burim pranë familjes, e cilëson atë “të tronditur” nga dhuna e ish-burrit të saj. “Ishte e bindur që ata u ndanë mirë”.

Përshtati: Gazeta “Si”

Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.