.png)
"Më rezulton se Kielini dhe Bonuçi kanë kërkuar me ngulm mirëkuptimin e forcave të rendit dhe në atë pikë nuk mbetej gjë tjetër, veçse të lejohej gjithçka dhe situata të administrohej në mënyrën më të mirë të mundshme", - ka thënë Prefekti i Romës, Mateo Piantedozi në një intervistë për “Corriere della Sera”, ku jep versionin e tij për festën e kombëtares së futbollit me autobusin e hapur që përshkoi rrugët e kryeqytetit pa asnjë lloj autorizimi.
Federata Italiane e Futbollit në fakt kishte kërkuar që të përdorte një autobus të hapur pas vizitës në kryeministri, por autorizimi iu mohua edhe nga Ministri i Brendshëm, Lamorgeze. Më pas u propozua që të montohej një skenë në “Piazza del Popolo”, ku mund të hipnin lojtarët për të festuar bashkë me tifozët. Por edhe kjo zgjidhje nuk ishte marrë në konsideratë.
"Na siguruan se lëvizja do të bëhej me një autobus të mbyllur, por në fakt erdhi një autobus i hapur dhe me parulla dedikuar kampionëve të Europës”, - ka shtuar Piantedozi, për ta mbyllur me një fjali që lë hapësirë për reflektim: "Uroj që Italia vitin e ardhshëm të fitojë Botërorin dhe për të njëjtat festime do të bisedojmë direkt me futbollistët".
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
