.png)
Një tjetër konflikt në dukje për shfrytëzimin e hapësirave publike në plazhe është regjistruar në plazhin e Drimadhesit, këtë herë fatmirësisht pa humbje njerëzore, por vetëm me dëme materiale.
Policia njoftoi se gjatë natës janë djegur rreth 60 shezlonë në pronësi të një personi.
Dyshimet e para janë që zjarrvënia është e qëllimshme dhe lidhet me përplasjet e pretendimet për shfrytëzimin e hapësirave publike të plazhit, që në këtë zonë mbulohen nga Bashkia e Himarës.
Ngjarja pason masakrën e ndodhur në Velipojë, ku për të njëjtat arsye mbetën të vrarë 4 persona dhe dy të tjerë u plagosën pas përplasjes me armë për shfrytëzimin e hapësirave publike të plazhit.
Kjo përplasje nxorri në pah vonesat e pushtetit vendor e qendror për të ndarë në kohë hartat e shfrytëzimit të këtyre hapësirave, ndërsa institucionet bënë ping-pong mbi përgjegjësinë e vonesave.
Por si funksionon ndarja e këtyre hapësirave? E thënë në vija të trasha, bashkitë bregdetare identifikojnë plazhet publike dhe me topografët në terren ndërtojnë hartat për shfrytëzimin e tyre nga subjektet private dhe më pas i dorëzojnë të Agjencia Kombëtare e Bregdetit, në varësi të Ministrisë së Turizmit.
Më pas, subjektet e interesuara për shfrytëzimin e këtyre hapësirave aplikojnë përmes sistemin online e-Albania për leje shfrytëzimi. Pas marrjes së lejes së miratuar nga Agjencia Kombëtare e Bregdetit subjektet dorëzojnë te bashkitë një kopje të saj, që i bashkëngjitet dosjes së plotë, ku përcaktohen përmasat e hapësirës që jepet për shfrytëzim dhe taksat që rrjedhin nga ky shfrytëzim, të cilat mblidhen nga bashkitë.
Në rastin e Velipojës, dyshimet janë se për familjen Gocaj procesi ka mbetur i bllokuar te leja e Agjencisë Kombëtare të Bregdetit. Arsyet mbeten të paqarta, por shqetësim mbi vonesat në këto procedura, kur sezoni turistik pothuajse po hyn në kulmin e tij kanë shprehur edhe biznesmenë të tjerë, ndërsa ka nga ata që pretendojnë edhe për mbivendosje hartash.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
