.png)
Skena më gazmore është ajo që duket Boris Johnson, duke u përpjekur të gjejë çorapet në fund të një takimi dashurie me të dashurën e tij: në fund ai nuk i gjen ato dhe shkon pa çorape në atë që duhet të ketë qenë data më e rëndësishme e ditës së tij, ose përurimi i Lojërave Paraolimpike, i cili e sheh të ulur midis gruas së tij (të varfër) Marina dhe Princeshës Anna.
Kjo është një nga zbulimet e bëra nga gruaja biznesemene amerikane, Jennifer Arcuri, në një rrëfim të gjatë për gazetën “Sunday Mirror”: që ajo ishte lidhur me kryeministrin aktual britanik dihej, por tani, për herë të parë, ajo tregon se ishte një marrëdhënie që vazhdoi për katër vjet, nga viti 2012 në 2016-ën.
Dhe detajet pikante janë me bollëk. Të dy ishin takuar kur Jennifer, tani 35 vjeçe, ishte ende studente. Por kjo nuk e kishte bindur kryetarin e atëhershëm të Bashkisë së Londrës që ta bënte atë zonjën e tij.
Boris as nuk u përpoq të fshihte aferën intime: ai e çoi atë në bare dhe restorante në Londër, e puthi dhe përqafoi në publik, duke treguar indiferencë totale.
Sipas saj, kur ata u takuan, ai “nuk mund t’i mbante duart në vend”.
Edhe pse, si një person i kulturuar që është, atij i pëlqente të recitonte soneta të Shekspirit me të, si dhe të bënte seks.
Boris i dërgonte vazhdimisht mesazhe të rrezikshme në telefonin e saj celular: dhe Jennifer e kishte regjistruar emrin e tij të koduar me “Aleksandri i Madh” (në fakt emri i tij nuk është Boris, por Aleksandër).
Por kjo nuk është e gjitha: në më shumë se një rast, gruaja i dërgoi Borisit fotot e saj ‘topless’ (të cilat ajo i përcakton si “artistike”).
Nga ana tjetër, duhet të mbahet mend, se Jennifer, në apartamentin në Londër, në të cilin ata u takuan, kishte një pistë vallëzimi dhe mobilje të rafinuara. Marrëdhënia midis të dyve, ishte zbuluar në fund të vitit 2019.
Një hetim është ende i hapur ndaj Borisit, sepse si kryetar i Bashkisë së Londrës, ai i kishte dhënë të dashurës së tij, e cila ishte bërë një sipërmarrës në sektorin e teknologjive të reja, kontrata fitimprurëse.
Përveç kësaj, dyshohet se ai e ka marrë me vete në disa udhëtime zyrtare në kurriz të taksapaguesve.
Por çfarë efekti do të kenë këto zbulime? Ndoshta asnjë: sepse Boris, në një nivel personal – dhe jo vetëm – tashmë i është falur gjithçka.
Që ai është një “kurorëshkelës”-serial, është një fakt i vërtetuar: Marina, gruaja e tij për 25 vjet, e kishte dëbuar atë jashtë shtëpisë disa herë, për shkak të tradhtive të tij.
Largimi përfundimtar, që çoi në divorc, ishte marrëdhënia me Carrie Symonds, tashmë e vendosur në zyrat e Dauning Street, si e dashura e parë: por Carrie, ishte ndoshta thjesht e dashura në detyrë, e cila u gjend në vendin e duhur në kohën e duhur.
Për të mos përmendur fëmijët e shpërndarë andej-këtej. Zyrtarisht janë gjashtë: katër nga Marina, një nga një konsulente arti (një tjetër e dashur) dhe i fundit nga Carrie.
Por kush e di se sa të tjerë mbajnë “firmën” e Borisit…
A ka rëndësi e gjitha kjo? Në një farë mënyre, po: sepse në krye të një vendi të madh, si Britania e Madhe, është një “mashtrues-serial”, një ngatërrestar i madh, i cili kurrë nuk ka arritur ta rregullojë jetën e tij private.
Dhe karakteri, për një politikan, është i rëndësishëm.
Megjithëse, ai duhet të pranohet për vizionin dhe udhëheqjen që e lejuan atë të përfundonte Brexit-in, të fitonte zgjedhjet dhe tani ta vendoste kombin e tij në rrugën që po e çon atë drejt fundit të pandemisë.
Pra, kush është Boris Johnson në fund të fundit? Pavarësisht gjithçkaje, një “i poshtër-gjenial”.
Përshtati: Gazeta “Si”
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
