Grupi më i popullarizuar në Bosnjë, Dubioza Kolektiv, ka një anëtar të ri që këndon dhe luan instrumente muzikorë, një robot i quajtur Robby Megabyte.
Studentët nga shkolla e inxhinierisë elektrike të Universitetit të Sarajevës ranë dakord të ndërtonin Robby pasi banda kërkoi një robot të dizajnuar për t’iu përshtatur konceptit të albumit të tyre ‘fakenews’, i cili u publikua vitin e kaluar.
“Roboti ynë … pëlqen të hajë, të pijë, të bërtasë, atij i pëlqen muzika”, tha Vedran Mujagic, kitaristi i grupit.
Në një videoklip për albumin ‘fakenews’, një anëtar i grupit mendon se do të ishte kënaqësi që një robot të bëjë punën e tij ndërsa ai relaksohet dhe argëtohet, kështu që ai kërkoi një të tillë.
Gradualisht e gjithë banda zëvendësohet nga robotë në klip, duke “i lejuar” burrat të shkojnë dhe të festojnë.
Një nga studentët që ndihmuan në ndërtimin e robotit të përdorur në album, Almir Besic, tha se projekti kishte qenë një sfidë sepse ata nuk dinin asgjë në fillim për ndërtimin e robotit dhe nuk kishin pajisjet e nevojshme.
Ata përdorën materiale të ricikluara dhe u deshën rreth dy vjet për të përfunduar projektin.
Kur Robby më në fund erdhi në jetë, “ishte një moment shumë euforik, pas kaq shumë përpjekjesh, kaq shumë orësh të kaluara duke punuar në shkollë për të parë që funksiononte”, tha Besic.
Banda Dubioza Kolektiv është e njohur për stilin e saj muzikor eklektik dhe tekstet që lidhen me shoqërinë dhe politikën.
Robby mori pjesë në koncertet e përjavshme online të bandës të quajtura “Quarantine Show” gjatë izolimeve të vendosura vitin e kaluar për të frenuar përhapjen e pandemisë së koronavirusit.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
