Në prag të Botërorit të ri të Formula 1, rifillon dueli mes Mercedesit dhe Red Bullit jo vetëm në pistë. Rikthehen polemikat dhe skuderia austriake e ka drejtuar menjëherë gishtin kundër Mercedesit dhe sistemit DAS, aq shumë i diskutuar gjatë testeve dimërore në Barcelonë. Pasi ky sistem u përdor në provat e lira të Çmimit të Madh të Austrisë, drejtuesit e Red Bullit vendosën të protestojnë, duke e quajtur anomali, por reklamimi i tyre është hedhur poshtë.
Sipas FIA-s, makinat e Hamilton dhe Botas kanë qenë objekt proteste nga ana e Red Bullit, për shkak se kanë thyer rregullat teknike gjatë provave të lira. Bëhet fjalë për anën aerodinamike të makinave dhe modifikimin e sistemit të drejtimit. Sistemi DAS është në qendër të denoncimit të skuderisë austriake.
Në artikullin 3.8 të rregullores së FIA-s është saktësuar se është e ndaluar të bëhen modifikime sa i takon anës aerodinamike. Përfaqësuesit e Mercedesit janë thirrur në një mbledhje për të dhënë shpjegime për atë që ka ndodhur. Gjatë konferencës së zakonshme të shtypit, Kristian Horner, menaxheri i Red Bullit, tha se donte të ishte i qartë për sistemin që për sezonin e ri konsiderohet jashtë norme.
“Është një sistem inteligjent dhe i komplikuar, por rregullat janë komplekse dhe duhet kuptuar në cilën pjesë të normave futet. Për sezonin e ri është deklaruar i parregullt dhe tani pyetja që shtrohet është, nëse ka vlerë për këtë sezon apo jo”, tha Horner në konferencë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
