Një zgjidhje e vështirë: të anulohet sezoni 2020 i Formulës 1, për të rinisur direkt me 2021-shin. Ky është mendimi i ish-presidentit të FIA-s (Federatës Ndërkombëtare të Automobilizmit), Maks Moslei, në lidhje me momentin e vështirë që po kalon jo vetëm bota e motosportit përballë emergjencës së koronavirusit.
“Pritja rrezikon t’i përkeqësojë gjërat, nuk ka asnjë qartësi për të pasur ndonjë avantazh nga kjo situatë, – thekson Moslei për “Dpa”. – Nuk ka asnjë garanci që Formula 1 mund të fillojë në muajin korrik, përkundrazi, duket e pamundur kjo gjë. Duke anuluar sezonin, skuadrat dhe organizatorët e garave do të jenë më të qartë dhe do të planifikojnë gjithçka si duhet. Mund të shfrytëzohet ky vit pushimi për të krijuar një bazë financiare shumë më solide për të ardhmen. Përderisa nuk e dimë se çfarë do të ndodhë në nivel global me pandeminë, nuk është e mundur të bëjmë plane për Formulën 1 dhe kalendarin e saj”.
Kampionati i Formulës 1 duhej të kishte nisur më 15 mars me “Çmimin e Madh” të Australisë, por pandemia e koronavirusit shty jo vetëm atë garë, por edhe disa të tjera më pas me radhë. Për momentin, nuk ka një datë se kur mund të zhvillohet gara e parë për këtë sezon dhe nuk përjashtohet edhe mundësia që ai të anulohet, siç propozon edhe ish-presidenti i FIA-s, Moslei.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
